Cumaaqşamı künü, aprelniñ 25-nde, BM Havfsızlıq şurası Rusiye prezidenti Vladimir Putinniñ vaqtınca işğal etilgen Donbas topraqlarınıñ sakinlerine Rusiye pasportlarını berüv fermanı sebebinden toplaşuv keçirecek. Bu aqta Ukrainanıñ BM daimiy temsilciliginiñ vekili Oleg Nikolenko «Ukrinformğa» bildirdi.
Onıñ qayd etkenine köre, toplaşuv Ukrainanıñ talabı ile çağırıldı.
Nikolenkonıñ aytqanına köre, Rusiyeniñ qararı BM nizamnamesini, Havfsızlıq şurasınıñ Rusiyeniñ özü de rey bergen Minsk añlaşmalarınıñ yerine ketirilmesinen bağlı tedbirlerniñ tasdıqlanmasına dair 2202 (2015) qararını ve añlaşmalarnıñ özüni de boza.
«Havfsızlıq Şurasında reislik yapqan Almaniya eyyetine ve Ukrainanıñ diger ortaqlarına muracaatımızğa seslengenleri içün minnetdarmız», – dep qayd etti diplomat.
Toplaşuv Kyiv saatına köre 22:00-da başlanacaq.
Ukraina prezidenti Petro Poroşenko Rusiye prezidenti Vladimir Putinniñ Donbasnıñ işğal etilgen topraqlarınıñ sakinleri içün pasportlar buyruğı sebebinden Ukraina halqına muracaat etti.
Yañı saylanğan Ukraina prezidenti Volodımır Zelenskıynıñ taqımı Facebook beyanatında Rusiye memleketimiz tarafından vaqtınca kontrol etilmegen topraqlarımızda bulunğan Ukraina vatandaşlarına Rusiye pasportlarını berüv fermanı ile işğalci devlet olaraq mesüliyetini tanıdı, dep qayd etti.
Ukraina Tış işler nazirligi Rusiye akimiyetiniñ Rusiye tarafdarları küçleri tarafından işğal etilgen Donbas sakinlerine Rusiye pasportlarınıñ berilüvini qolaylaştırmaq qararını tenqit etti. Ukraina Rusiye akimiyetiniñ işğal altındaki Donbas topraqlarında yaşağanlarğa Rusiye pasportlarını qolay bermek qararı sebebinden Birleşken Milletler Havfsızlıq şurasına muracaat etti.
Aprelniñ 24-nde Rusiye prezidenti Vladimir Putin Donbasnıñ işğal etilgen topraqlarında yaşağanlarğa Rusiye vatandaşlığını qolaylaştırılğan tertipte almağa imkân berecek buyruqnı imzaladı. Vesiqa metni Kremlniñ resmiy saytında Ukraina prezidenti saylavlarından üç kün keçken soñ derc etildi.
Qolaylaştırılğan vatandaşlıq aqqı «insan aqları ve serbestligini qorçalamaq içün gumanitar maqsadlarnen» berilecek, dep aytıla fermanda. İstegi olğan er kes ariza ve «DNR» ve «LNR» gruppalarınıñ regionda yaşağanını tasdıqlağan vesiqalarnı Rusiye İç işler nazirliginiñ bölüklerine bere bile. Arizalar üç ay içinde baqılacaq.
Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete.
BM malümatına köre, 2018 senesi dekabr ayına qadar zıddiyet vaqtında 13 biñ insan elâk oldı, tahminen 30 biñ yaralandı.
