BM insan aqları Yuqarı komissarınıñ idaresi Ukrainada Rusiye Federatsiyasınıñ Ukrainağa qarşı başlatqan cenki sebebinden 7256 vatandaş öldi ya da yaralandı, dep qayd etti.
BM, 3496 insannıñ ölümini ve 3760 insannıñ yaralanğanını tasdıqladı. Bu malümat fevralniñ 24-nden mayısnıñ 10-na qadar aittir, dep bildirdi BM insan aqları Yuqarı komissarınıñ idaresi.
Teşkilât kerçek raqamlar bayağı yüksek, dep qayd ete, «çünki cenk areketleri devam etken bazı yerlerden malümat keç alına ve tasdıqlanması kerek olğan vatandaşlar ölgenine dair malümat kelgen yerler çoq».
Bu, meselâ, Mariupol (Donetsk vilâyeti), İzüm (Harkiv vilâyeti) ve Popasna (Lugansk vilâyeti) meskün yerlerinen bağlı, «anda, berilgen malümatqa köre, vatandaşlar arasında ölgen ve yaralanğanlar çoq. Olar verifikatsiyağa tabiiydir ve yuqarıdaki statistikağa kirsetilmegen».
BM, çoqusı vatandaş ölümi ağır top ve reaktiv topçu ateş sistemalarından açılğan ateş, raketa ve ava darbeleri olğan keniş zararlı patlayıcı silânıñ qullanıluvınen bağlı, dep qoştı.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
