Bu sene ilk küz yağmurı işğal etilgen Qırımnıñ ğarbiy yalısında kurort olğan Kezlev içün sınav oldı. Şeerniñ soqaqları birden suvğa battı, yerli sakinler ise şişirilgen qayıqlar ve saplarda yürmege mecbur oldılar. Olarnıñ aytqanına köre, meseleniñ sebebi, yıllar devamında temizlenmegen yağanaq boruları ve Rusiye tarafından qurulğan yalı kenarınıñ leyhacılarınıñ hususiy qararları oldı. Qırım.Aqiqat ne olğanını ögrendi.
Suv basqan soqaqlar ve açuvlanğan şeerliler — böyle şekilde Kezlevde küzni qarşılaylar. Birinci yağanaqlar şeerni "Qırım Venetsiyasına" çevirdi. Bundan evel de bu kibi vaqialar olğan edi, deñiz yalısı şeerini furtunalar qaplap alğan edi, tabiat aqibetleri ise yerli sakinler içün sınav oldı. Amma bu sefer problemler adiy yağmurdan soñ başlandı. Şeer sakinleri Moskvanıñ nezareti altında olğan şeer akimiyetini mesüliyetli dep saya.
Qayıqlar ve kürek çekken qadın
Ava bozulması İlk küzniñ 6-nda Kezlevge keldi. Küçlü yağmur birden bir qaç soqaqnı bastı. Eski şeer ve yalı kenarındaki territoriya hususan zarar kördi. Yerli sakinler soqaqlarda rezina qayıqlarda ve saplarda yürmege mecbur oldılar.
Eñ populâr video — soqaq boyu sapnen yaldağan qadın.
Tereşkova adına şeer yalısına yaqın bir soqaq suvğa battı. Rusiye akimiyeti bu sene onı 1,69 milliard rublege tamir etken edi. İşler yedi yıl devam etti ve neticede yañı problemlerge yol açtı.
"Mimarlar sayesinde Venetsiyada ola bilesiñiz"
Yerli sakinlerniñ fikrince, yalı kenarınıñ leyhacılarınıñ qararları, yağmurnıñ az bir yağmurı bile yanındaki topraqnı suv basmasına sebep oldı.
"Dört yıl evelsi şu yerde sağanaq yağdı, ve suv bütünley deñizge töküldi. Bu yerden suv ketkenini açıq-aydın körmek mümkün edi. Şimdi ise, hususiy mimarlarımız sayesinde, böyle şeyimiz bar. Aşağı tüşesiñ, Venedikke tüşesiñ. Bu sağanaq degil, bu bir kiçik yağmur. Ve böyle şeyler bizde ola", — yerli sakin Vadim Kurçuk öz blogunda tarif ete.
Kezlev içün problem olaraq yağanaqlarnı baş etip olamağan yağanaq boruları qala.
Ne içün bu mesele yıllar devamında çezilmedi — belli degil.
"Saylavlar daa müim"
Rusiye kontrolindeki Kezlev akimiyeti olıp keçken vaqialarğa açıq şekilde cevap bermedi. Kezlevniñ rusiyeli memuriyetiniñ yolbaşçısı Vitaliy Oganesyan bu aqta susmaqta.
Memuriyetniñ özünde de suv basuvları aqqında aytmaylar. Onıñ yerine müessise, "yaz ve küz arasında qısqa bir müddet içinde Kezlev hususan raat ve çekici ola", dep ayta.
Kezlev sakinleri yerli Rusiye akimiyetiniñ areketsizliginden memnün degil.
"Yağmur toqtadı. Gorkiy soqağında, er vaqıt olğanı kibi, sel, suv tura. Bizim memuriyetimiz ve kommunal hızmetçilerimizniñ raatlıq künümi? Olarğa epsi birmi?" — dep yazalar içtimaiy ağlarda.
Tefsirlerde yerli sakinler farqlı fikirlerni bildireler: "Yağanaq boruları içün para yoq" ve "saylavlar yağmurdan daa müim".
Suv basqan yerlerde yaşağan ve çalışqan insanlarnıñ çoqusı avadan yañı sürprizler bekley. Tecribe köstergeni kibi, Kezlev içün yahşı bir şey köstermeyler.
Bu şeer 2023 senesi küzde yüz bergen "asır fırtınası" vaqtında Qırımnıñ eñ zarar körgen regionlarından biri oldı. O vaqıt ava sebebinden Saq-Kezlev trassası suvğa battı ve qapatıldı. Aqmescit soqağı o qadar suv astında qaldı ki, 300-den ziyade adamnı tahliye etmek kerek oldı.
Yerli sakinlerniñ aytqanına köre, o vaqıt insanlarnıñ "pencerelerine suv töküle edi", olar "damlarda oturıp, tahliye etilmek içün fenerler köstere ediler".
Qırımnıñ rusiyeli akimiyeti alâ daa bu afetniñ aqibetlerini tolusınen yoq etip olamadı.