ABD prezidentligine namzet Kamala Harris avgustnıñ 6-nda Demokratik firqadan prezident muavini vazifesine namzetini ilân etti. Bu, Minnesota eyaletiniñ valisi Tim Uolzdır. Tim Uolz aqqında ne belli, onıñ Rusiye-Ukrayina cenki ve Minnesota valisi olaraq yapqan Ukrayinağa nisbeten areketleri aqqında ne belli? Yañı saylanğan vitse-prezident olaraq Uolz ABD siyasetine ve Ukrayinağa yardımğa nasıl tesir ete bile? "Amerikanıñ sesi" ukrayin hızmeti Tim Uolznıñ Ukrayina aqqında esas sözlerini topladı.
Minnesota valisi Tim Uolz, Rusiyeniñ Ukrayinağa istilâsı başlağanından berli Ukrayinağa qoltuta. Böylece, 2022 senesi fevralniñ 24-nde o, öz saifesinde Ukrayinağa qoltutuv sözlerini yazdı.
"Minnesota Ukrayina halqına qoltuta ve Rusiyeniñ qanunsız istilâsını takbih ete. Bütün dünya liderleri birleşip, demokratiyağa yapılğan bu ücümge cevap bermek kerek", — dep yazdı Walls.
Ertesi künü, fevralniñ 25-nde, o Ogayonıñ valisi, cumhuriyetçi Mayk Deuayn ile beraberlikte Ukrayinağa eki firqa tarafından qol tutuv aqqında ilân etti. Bu ABD federal ükümetiniñ mesleat organıdır.
"Ukrayinanı destekleymiz ve Rusiyeni bu provokatsiyağa oğratılmağan ve qanunsız ücümleri içün takbih etemiz", - dep aytıla Uolznıñ adından yapılğan beyanatta. "Biz federal ükümetke zorbalıq vaqtında memleketimizni idare etüvde qol tutmağa azırmız, ve men barışıqqa irişmek içün siyasiy fırqalarğa baqmadan, akimiyetniñ er seviyedeki liderlerinen çalışmağa söz berem. Birleşmege, demokratiyanı qorumağa ve zorbalıqnı toqtatmaq ve Rusiyeni mesüliyetke çekmek içün beraber çalışmağa vaqıt keldi".
Bir qaç aydan soñra olar ABD prezidenti Joe Baydenniñ Rusiyeniñ Ukrayinağa qarşı tecavuzından sebep ABD kiber qoruvını quvetleştirmek teşebbüsine qol tuttılar.
"Siziñ kiber havfsızlıqnıñ milliy prioritet olaraq saqlanuvı ile bağlı olğan qasevetleriñizni paylaşamız ve siziñ aytqanıñız kibi, bizim valilerimiz memleketimiz ve iqtisadiyatımıznı temin etken ağlar, sistemalar ve ameliy tehnologiyalarnı qorçalamağa azırlar", — dep aytıla Valiler Şurasınıñ haberinde.
Martnıñ 2-nde Ukrayina ile birdemlik bildirip Uolz Minneapolisteki ukrayin katolik kilsesini ziyaret etti.
Ukrayinanıñ cesür ve sabırlı halqı azatlıqnı ve demokratiyanı zulumdan qorçalamağa devam etkende, biz ukrayin cemaatımıznen berabermiz
Martnıñ 4-nde gubernator Uolz, ştat seviyesinde bütün devlet agentliklerinden Rusiye qurulışlarınen alâqalarını toqtatmağa ve kelecekte alâqalardan vazgeçmege talap etken ferman imzaladı. Em de şahsiy şirketlerni Moskva ile işbirlikten vazgeçmege çağırdı.
Bir aydan az bir vaqıt içinde Minnesota kongressinde aynı böyle bir qanun leyhası qabul etildi, o da Belarusta yasaqnı kenişletti.
2022 senesi martnıñ 6-nı Uolz Minnesota ştatında Ukrayina birdemligi künü olaraq ilân etti.
"Ukrayinanıñ cesür ve sabırlı halqı azatlıqnı ve demokratiyanı zulumdan qorçalamağa devam etkende, biz ukrayin cemaatımıznen berabermiz", — dep yazdı Uolz X ağındaki öz saifesinde.
Uolz, Ukrayina ile bağlı halqara körüşüvlerni de keçire.
2022 senesi iyünniñ 30-nda o, Litvaniya baş naziri Krişyanis Karinş ile Kıyivge yardımda işbirlikni muzakere etti.
"Bizim eyaletimiz Rusiye istilâsına qarşı Ukrayina ve onıñ ittifaqdaşları ile beraber tura. Minnesotağa baş nazir Karinş ve Letiniya eyyetini qabul etmekten şeref duyam, ve ticariy inkişaf ve demokratiya qorunması içün ortaqlığımıznı inkişaf etmege ümüt etem", — dep yazdı o, öz saifesinde.
Bir yıldan soñ, 2023 senesi aprelniñ 4-nde, o, diger valilernen beraber Ukrayina prezidenti Volodımır Zelenskıy ile onlayn körüşüv keçirdi.
"Bugün saba men prezident Volodımır Zelenskıy ile körüşmek ve Ukrayinağa sadıq olğanımıznı tasdiqlamaq içün diger valilerge qoşuldım. Ukrayina zalımlıqtan azatlıqnı qorçalağan vaqıtta, Minnesota ukrayin cemiyetimizge ve Ukrayina halqına qol tuta", - dep yazğan edi o.
Minnesota, serbestlik ve demokratiyanı qorçalağan Ukrayinağa qol tutmağa devam etecek
2024 senesi, Rusiyeniñ tam miqyaslı istilâsınıñ ekinci yıllığında, vali Tim Uolz Ukrayinanıñ Vaşingtondaki elçiligini ziyaret etti ve ABD-deki Ukrayina elçisi Oksana Markarovanen körüşti. Anda o, Minnesota ştatı ve Çerniğiv vilâyeti arasında agrariya saasında işbirlik aqqında añlaşma imzaladı.
"Minnesota, serbestlik ve demokratiyanı qorçalağan Ukrayinağa qol tutmağa devam etecek. Minnesota ve Çerniğiv vilâyetiniñ devlet, şahsiy ve akademik sektorları arasında resmiy işbirlik qurmaq ve eyaletimizniñ Ukrayina ile bağlarını qaviyleştirmek içün Ukrayina elçiligini ziyaret ettim", — dep yazdı Uolz içtimaiy ağdaki saifesinde.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
