Bir sıra matbuat, İranda MAU uçağı raketanen urulğanı aqqında malümatnı derc ete

Yanvar 9-ında aqşam bir sıra çetel matbuatı, "Ukraina halqara ava yolları" şirketiniñ Tegeran-Kyiv Boeing uçağı yanvarniñ 8-inde İran raketa darbesinen urulğanınıköstergen malümatnı derc etti.

Bunı Azatlıq.Radiosı haber ete.

Londondaki IHS Markit ​meşur tetqiqat şirketi, Ukraina uçağı "İslâm inqilâbınıñ qaravulları korpusı"niñ İran bölüginiñ "Tor" (ya da SA-15) zenit ve raketa kompleksinen urulğanını köstergen esabatnı derc etti.

Amerikanıñ CNN ​televizion kanalı AQŞ-nıñ bir sıra memurlarına atıf etip, Washington "İran adaşıp ukrain uçaqnı urğanı"na daa çoq inana, dep yaza. Bu nazariye yoldaş ve radarlarnıñ malümatına ve amerikan askerler ve hafiyelik yoplağan elektron malümatqa esaslana.
CBS News televizion kanalınıñ mühbiri Chris Van Cleve Twitterde yazdı ki, Amerika hafiyeligi eki raketanıñ uçuşından soñ infraqırmızı yaşnaşnı qayd etti. Ondan soñra patlav qayd etildi.
The New York Times Amerika neşiri İranda Ukraina uçağına endirilgen raketa darbesiniñ videosını kösterdi.

«Ukraina halqara ava yolları» ava şirketiniñ PS752 seferli Boeing 737-800NG uçağı yanvarniñ 8-nde saba Tehrandan Kyivge yol alıp, İran paytahtınıñ halqara ava limanından çıqıp tüşti. 176 insan elâk oldı, 167-si yolcu ve 9 ekipaj azası edi. Elâk olğanlar arasında – 11 Ukraina vatandaşı (ekipaj azaları ve 2 yolcu).

Uçaq 2016 senesi yapıldı. Şirketniñ bildirgenine köre, bir problemi yoq edi ve yanvarniñ 6-nda uçuştan evel tehnik teşkerüvi yapıldı.

Ukraina Tış işler naziri Vadım Prıstayko, İrannen Ukraina uçağınıñ qazasını tahqiq etüv ve onıñ sebeplerini ögrenüvde eki memleketniñ tahqiqat gruppalarınıñ koordinatsiyası aqqında añlaştı, dep bildirdi.

Ukrainada yanvarniñ 9-nda İrandaki uçaq qazası sebebinden matem künü olaraq ilân etildi.