Qırımda bir künde altı hasta koronavirustan vefat etti, umumen pandemiya vaqtında 832 kişi vefat etti. Bu aqta Qırımnıñ Rusiye sağlıq nazirliginiñ er künlik monitoring malümatında aytıla.
«2841 insan (covid) ambulator tedaviylevde buluna, 1975 kişi (covid ve pnevmoniya) hastahanelerde yata, observatorlarğa alınğanlar yoq. Umumen (pandemiya vaqtında – muar.) 33828 Covid-19 hastası qayd etildi. Tüzelgen 29198 kişi yiberildi», – dep aytıla müessise haberinde.
Qırımda keçken künü 147 koronavirus hastası qayd etildi.
Qırım akimiyeti koronavirus pandemiyası sebebinden kirsetilgen sıñırlavlarnı yımşattı. Qırımnıñ Rusiye yolbaşçısı Sergey Aksenov sıñırlavlar martnıñ 1-ne qadar tamamen lâğu etilecek, dep ilân etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
