Qırımda COVID-19 hastalarınıñ sayısı eksilmege devam etse, koronavirus pandemiyası sebebinden kirsetilgen sıñırlav tedbirleri baarge doğru lâğu etilecek, dep bildirdi fevralniñ 10-nda Qırımnıñ Rusiye yolbaşçısı Sergey Aksenov COVID-19 ile küreş operativ ştabınıñ toplaşuvında.
«Şimdiki dinamika devam etse, martnıñ 1-ne qapalı olğan esas faaliyet saalarını açacaqmız, işten boş vaqıt tedbirlerini teşkil etken müessiselerni de aytam. Artıq er keske para qazanmağa imkân bermeli», – dedi o.
Qırımnıñ baş sanitar ekimi Natalya Penovskaya qayd etti ki, belli saalarda bazı sıñırlavlar qala bile. O, maska taquv rejimi, mesafe ve dezinfektsiya rejimi daa uzun müddetke qalacaq, dep ayttı.
Qırım akimiyeti koronavirus pandemiyası sebebinden kirsetilgen sıñırlavlarnı yımşattı.
Qırımda keçken künü 147 koronavirus hastası qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
