Rusiye kontrolindeki Qırım yolbaşçısı Sergey Aksenovnıñ mayısnıñ 13-nde bildirgenine köre, keçken künü 30 yañı koronavirus hastası qayd etildi.
«28-i daa evel qayd etilgen yerlerde qırğınlıqqa qarşı tedbirler ve laborator skriningi neticesinde tapıldı, hususan 22-si Saq rayon hastahanesinde qayd etildi. Daa eki hasta nefes virus yuqunçı alâmetlerinen tibbiy yardım içün muracaat etkende qayd etildi», – dep qayd etti Aksenov.
Onıñ aytqanına köre, Qırım ve Aqyardaki Rospotrebnadzor idaresiniñ mütehassısları epidemiologik tahqiqat keçire, profilaktika tedbirleri keçirilgen şahıslar belgilendi.
Rospotrebnadzor idaresiniñ yolbaşçısı Natalya Penkovskaya qayd etkenine köre, yañı hastalar yaltalı bir qorantadan kele.
Böylece, al-azırda Qırımda 239 koronavirus hastası qayd etildi. 24-ü çetelden keldi, 21-i – Rusiyeden. Eki kişi vefat etti, daa ekisiniñ vefat sebebi şimdilik belli degil, amma COVID-19 qayd etilgen edi. 78 insan tüzelip yahşı oldı. Aqyarda – 129 koronavirus hastası bar, eki kişi vefat etti.
Qırımnıñ Rusiye akimiyeti bildirgenine köre, mayısnıñ 12-nden itibaren mecburiy qoruv maskalarını taquv rejimi kirsetile, Qırımda özüni izolâtsiya etüv rejimi mayısnıñ 31-ne qadar uzatıldı.
«Qırım aq qorçalayıcı gruppası» bildirgenine köre, aprelniñ 13-nden 19-na qadar işğal etilgen Qırımda ve Aqyarda resmiy şekilde qayd etilgen COVID-19 hastalarınıñs ayısı aman-aman eki qat arttı. Aq qorçalayıcılar, monitoring vaqtında elde etilgen malümat Rusiye akimiyeti derc etken resmiy raqamlarnıñ kerçek olmağanını köstere, dep bildire.
Ukraina prezidentiniñ Qırım Muhtar Cumhuriyetindeki daimiy temsilciligi de aynı qorqularını bildire.
ABD OSCE elçisi James Gilmore emin ki, işğal etilgen Qırım COVID-19 pandemiyasından zarar köre, amma «Rusiye qorquzğanı» içün yarımadadaki epidemiologik vaziyetke dair kerçek malümat yoq.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
