ABD prezidenti Joe Biden mayısnıñ 9-nda Rusiye prezidenti Vladimir Putinniñ Rusiye Federatsiyasınıñ Ukrainağa qarşı başlatqan cenkinden çıqmağa çaresi olmağanından qasevetlene, dep bildirdi.
Reuters agentligi yazğanına köre, Washingtondaki tedbirde çıqışta bulunğan Biden Putin Ukrainağa büyük ücüm etse, NATO ve Avropa Birligi dağılırlar dep yañlış tüşündi, dep ayttı. ABD ve bir çoq Avropa memleketi Ukraina etrafında birleştiler.
Biden Putin er şeyni esaplağan bir insan, dep ayta, ve onı qasevetlegen mesele Rusiye prezidentiniñ «bir çaresi olmağanı» ola.
ABD prezidenti ne yapacağını añlamağa tırışa, dep qoştı.
Rusiye fevralniñ 24-nde Ukrainağa qarşı büyük ücüm başlattı, amma ukrainalılar tirengeni içün istegenine irişemedi, Kyiv zapt etemedi.
Aprelniñ 22-nde Rusiye «Ukrainadaki mahsus operatsiyanıñ» ekinci fazası vaqtında yañı planları aqqında bildirdi. Rusiye arbiyleri işğal etilgen Qırımğa ayat yapmaq ve Pridnestrovyege çıqmaq içün Donbasnı ve cenübiy Ukrainanı bütünley kontrol altına almağa niyetlene, dep bildirdi. Ğarbiy istihbaratnıñ malümatına köre, Rusiye ordusınıñ Donbastaki muvafaqiyetleri sıñırlı ve Ukraina küçlü tirengeni içün Rusiye ordusınıñ ğayıpları büyük ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
