ABD Milliy telükesizlik şurasınıñ vekili John Kirby Kyiv ve Moskva arasında Qırımnen bağlı muzakere keçirüv imkânlarını izaatladı. Onıñ aytqanına köre, böyle muzakereniñ teşebbüsçisi ancaq Ukrayına prezidenti Volodımır Zelenskıy ola bile.
Beyaz Saray vekili Washingtonnıñ Ukrayınasız iç bir Ukrayına muzakeresi olamaz laflarını hatırlattı.
«Tek prezident Zelenskıy azırmı ve muzakere etecekmi, ne şekilde ve ne aqta ayta bile. Ukrayınasız Ukrayına muzakeresi olamaz, dep tüşünemiz», – dep qayd etti Kirby.
Financial Times neşiri derc etken maqalede Ukrayına prezidenti ofisiniñ temsilcisi Andriy Sıbiğa Ukrayına ordusı Qırımnı cenk yolunen qaytarmağa başlamazdan evel Rusiye ile muzakereler ola bile, dep ayttı.
«Uruş meydanında strategik maqsadlarımızğa irişip, Qırımnıñ memuriy sıñırına çıqsaq, diplomatik etapnı başlatmağa ve bu meseleni muzakere etmege azırmız. Amma Qırımnı cenk yolunen azat etüv imkânını red etemiz demek degil», – dep qayd etti o.
Memur, Kyiv topraq uzlaşuvlarına razı olmaycaq, Rusiye ile muzakere ise yarımadanı qaytarmaq içün ola bilecek bir optsiya ola, dep qoştı.
Ukrayına prezidenti ofisiniñ yolbaşçı mesleatçısı Mıhaylo Podolâk Qırım.Aqiqatqa intervyü berip, Ukrayına Qırımnı beş-yedi aydan qaytarır, dep ayttı. Onıñ bildirgenine köre, Rusiye Federatsiyasınıñ tam istilâsı yarımadanı işğalden qurtaruv esaslarını doğurdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net/?utm_medium=otf&utm_campaign=proxy&utm_source=otf. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
