Aqmescit SİZOsında bulunğan qırımtatar faali Edem Bekirovnıñ qızı Eleonora Bekirova, ağır hasta babasınıñ sağlığı yaramaylaşqanını bildirdi.
“Kene Qırımdan fena haberler. Cuma künü, aprel 12-sinde advokat babam Edem Bekirovnı SİZOda ziyaret etti. Yahşılaşuvlar yoq. Köksüniñ sol tarafında ağrı peyda oldı, daima aşqazanıraatsızlay, öksürik, nefes almağa qıyın, şeker seviyesi olğanı kibi yüksek, oturıp yuqlay, qan basımı 160-tan 110-ğa sıçray, dudaqlarında şişiklik ve yaraçıqlar peyda oldı”, - dep yazdı Bekirovnıñ qızı Facebookta.
Eleonora qayd etti ki, advokatnın aytqanı köre, babası hastahanege yatqızmalı.
O, babası kerekli kibi baqılsın ve hastahanege yatqızılsın muracaatınen ukrain ombudsmeni Lüdmila Denisovağa hitap etti.
Keçenleri Ukraina Yuqarı Radasınıñ insan aqları vekâletlisi Lüdmila Denisova Rusiye zenaatdaşı Tatyana Moskalkovağa qırımtatar faali Edem Bekirovnıñ sağlıq vaziyeti aqqında muracaat yolladı. O, tibbiy teşkerüvden soñ insulin iñektsiyalarından allergiya keçirdi.
Aqmescitniñ Kiyev rayon mahkemesi qırımtatar faali Edem Bekirovnıñ apiste qaluv müddetini eki ayğa uzattı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
