Aqmescitniñ Kiyev rayon mahkemesi silâ ve patlayıcı maddelerniñ qanunsız saqlağanında qabaatlanğan qırımtatar faali Edem Bekirovnıñ apiste qaluv müddetini eki ayğa uzattı. O, 2019 senesi iyünniñ 12-ne qadar SİZOda qalacaq. Bu aqta advokat İslâm Velilâyev Qırım.Aqiqat mühbirine haber etti.
«Bekirovğa ev apsi kibi daa yımşaq bir sıñırlav tedbirini belgilemek içün imayeniñ bütün kerekli vesiqaları bar edi. Amma prokuror ve qadı delillerimizge qulaq asmayıp, ağır hasta adamnı SİZOda qaldırğanlar», – dep tarif etti advokat.
Advokatnıñ daa evel bildirgenine köre, Aqmescit SİZOsınıñ tibbiy bölüginde bulunğan Bekirovnıñ insulin dozası arttırıldı, amma qan şekeri tüşmey ve yüksek seviyede qala.
Keçenleri Ukraina Yuqarı Radasınıñ insan aqları vekâletlisi Lüdmila Denisova Rusiye zenaatdaşı Tatyana Moskalkovağa qırımtatar faali Edem Bekirovnıñ sağlıq vaziyeti aqqında muracaat yolladı.
O, tibbiy teşkerüvden soñ insulin iñektsiyalarından allergiya keçirdi.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
