Advokatlar Aleksey Ladin ve İslâm Velilâyev Rusiye ombudsmeni Tatyana Moskalkovağa muracaat etip, qırımtatar faali Edem Bekirovnıñ Aqmescit SİZOsından ev apsine avuştırılmasına yardım etmesini rica etti.
Bu aqta Ladin Qırım.Aqiqatqa bildirdi.
«İmaye, muracaat berip, Edem Bekirovnıñ apiste tutuluv sıñırlav tedbirini ev apsine deñiştirmek muracaatını Aqmescitniñ Merkeziy rayon mahkemesine yollamağa rica ete. Böylece, imaye, Tatyana Moskalkovadan Kyivdeki matbuat konferentsiyasında aytqanlarını (Bekirovnıñ ev apsi aqqında – QA) tasdıqlamasını rica ete», – dep tarif etti Ladin.
Onıñ bildirgenine köre, iyülniñ 17-nde Moskvada iş ziyaretinen bulunğan Ukraina ombudsmeni Lüdmila Denisova mezkür muracaatnı Rusiye zenaatdaşına şahsen bermeli.
Bekirovnıñ imayesi Rusiye ombudsmenini Avropa insan aqları mahkemesiniñ qararını da yerine ketirmege çağıra.
«Bundan ğayrı, Avropa insan aqları mahkemesiniñ qararını yerine ketirip, hastalıqlarında mütehassıs olğan mustaqil ekimlerni celp etmege rica etemiz. Avropa mahkemesi bunı eki kere talap etken edi ve, bilgenime köre, Tatyana Moskalkova ve Lüdmila Denisova bu aqta añlaştılar», – dedi o.
Yuqarı Radanıñ insan aqları vekâletlisi Lüdmila Denisova advokat Aleksey Ladinniñ aytqanlarını daa izaatlamadı.
Malüm ki, Ukraina Yuqarı Radasınıñ insan aqları vekâletlisi Lüdmila DenisovaRusiye ombudsmeni Tatyana Moskalkova ile Rusiyede apiste tutulğan Edem Bekirov, Volodımır Baluh ve Volodımır Dudkağa mustaqil tibbiy teşkerüv temin etilüvi aqqında añlaştı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
