İşğal etilgen Aqyarda aprelniñ 27-nde beş yañı koronavirus hastası qayd etildi. Bu aqta şeer yolbaşçısı vazifelerini eda etken Mihail Razvojayevniñ malümatına esaslanıp Rusiye ve Aqyar kütleviy haber vastaları bildire.
Eki yañı hasta – Omega körfezi rayonında eki gospital (Rusiye Mudafaa nazirligine ait tibbiy merkez – QA) qurucısıdır, koronavirus hastasınen bir odada yaşadılar, eki kişi Aqyar şeer yuqunç hastahanesinde çalışqan ve koronavirus diagnozı tasdıqlanğan emşireniñ soyları, daa bir kişi bu tibbiy müessiseniñ hadimi ola.
Berilgen malümatqa köre, dördünci hastahane hadimleri ve Svâto-Georgiyevskiy manastırınıñ keşişlerinde koronavirus tasdıqlanmadı.
Razvojayevniñ qayd etkenine köre, alınğan tedbirlerge baqmadan, «Aqyarda hasta sayısı arta».
Onıñ aytqanına köre, Rusiye Mudafaa nazirligine ait tibbiy merkez qurucılığında 700 insan eki nevbetnen çalışa, 200-ü aqyarlı ola. Qurucılıqnı toqtatmamaq içün meydançıq observator olacaq, işçiler eki afta devamında andan ketip olamaz, insanlarnı çadırlarda qaldıracaqlar.
Yarımadanıñ felâket tibbiyeti ve acele tibbiy yardım merkeziniñ malümatına köre, işğal etilgen Qırımda keçken künü koronavirus şübhesinen hastahanege alınğan insanlarnıñ sayısı rekord oldı.
Aprelniñ 27-nde saba Qırımda bir koronavirus hastası qayd etildi – İslâm Terek rayonınıñ tibbiyet hadimidir.
Al-azırda Qırımda 70 koronavirus hastası bar. 20-si çetelden keldi, 10-u Rusiyeden, 40-ı yerli ola. Aqyarda, soñki malümatqa köre, 31 COVID-19 hastası qayd etildi.
Qırımda ve Aqyarda bir çoq müessise ve teşkilâtnıñ faaliyetini toqtatqan ve vatandaşlarnıñ özüni izolâtsiya etmesini belgilegen yüksek seviyeli azırlıq rejimi aprelniñ 30-na qadar devam ete.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
