Açlıq ilân etken ukrainalı faal Volodımır Baluh deñişüvni Rusiye koloniyasından «sağ çıqmağa imkân berecek yekâne fırsat» dep saya. Bu aqta o, Qırım aq qorçalayıcı gruppasınıñ koordinatorı Olga Skrıpnikke yazğan mektübinde bildirdi. Skripnik, mektüp kopiyasını Qırım.Aqiqatqa berdi.
«Bu vaziyette Ukrainanıñ serbest vatandaşınıñ yaşav aqqını radikal usullarnen talap etmekten başqa çare körmeyim. Talaplarım yerine ketirilgenine qadar açlıqnı toqtatmaycam, añlağanıñız kibi, ümüt yoq… Mından sağ çıqmaq içün yekâne fırsat deñişüv ola, dep tüşünem», – dep yazdı Baluh.
Cumaaqşamı künü, iyünniñ 27-nde, Rusiye Apostol pravoslav kilsesiniñ yepiskopı, Sankt-Peterburg Aq qorçalayıcı şurasınıñ azası Grigoriy Mihnov-Vaytenko Qırım.Aqiqatqa Rusiyeniñ Tver vilâyetindeki koloniyada tutulğan Volodımır Baluh kene açlıq ilân etti, dep bildirdi. İyünniñ 28-nde Baluhnıñ advokatı Olga Dinze Baluh yuqlamay ve suv içmey, dep tarif etti.
Bir qaç kün evelsi ukrainalı faal Volodımır Baluh Tver vilâyetiniñ koloniyasındaki ceza izolâtorına qapatıldı. Daa evel Baluhnı ceza izolâtorına avuştırğanda anda o, aman-aman eki ay bulundı. Soñra onı apishane hastahanesine avuştırğan ediler.
2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi. Daa soñra mahküm etilgen ukrain faali açlıqnı vaqtınca toqtatmağa qarar aldı.
Advokatlarnıñ malümatına köre, 200 künden çoq açlıq tutqan Baluhnıñ ülser ve pankreatit şübesi peyda oldı.
Volodımır Baluh – qırımlı çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.
2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.
Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.
