Bağçasaraydaki «Hizb ut-Tahrir davasınıñ» mabüsi Vadim Bektemirovnı Qırım izolâtorından Rostov-na-Donu SİZO-1-ge etap etkenler, dep haber ete «Qırım birdemligi» advokat Marlen Halikovnıñ malümatına esaslanıp. Advokatnıñ qırımlınıñ apis müddetini uzatuv qararına qarşı istinaf şikâyeti baqılğan mahkeme oturışuvında bundan haber oldı.
Advokatnıñ aytqanına köre, Vlasiha şeeriniñ İstinaf arbiy mahkemesi bu şikâyetni qanaatlendirmedi ve apiste tutuv müddetini 2021 senesi sentâbrniñ 15-i olaraq qaldırdı.
«Vadimniñ alı bir qarar, amma belli sağlıq problemleri bar. Al-azırda Rostov-na-Donu SİZO-1niñ bir kişilik kamerasında tutula», – dep bildirdi Halikov.
Nevbetteki oturışuv bu sene mayısnıñ 18-nde olacaqtır.
2020 senesi iyülniñ 7-nde yedi qırımtatarınıñ, hususan Vadim Bektemirovnıñ evinde tintüvler olıp keçti.
Rusiye FSBsiniñ malümatına köre, mahsus hızmetniñ hadimleri Qırımda «Hizb ut-Tahrirni» teşkil etkeninden ve iştirak etkeninden şübheli sayılğan yedi insannı tuttı. FSB, bu insanlar «Qırım sakinleri arasında terror mefküresini yayıp, qırımlı musulmanlarnı öz saflarına celp etti», dep bildire. Rusiye mahsus hızmetiniñ matbuat hızmeti bildirgenine köre, «(teşkilât) azalarınıñ yaşağan yerlerinde Rusiyede yasaqlanğan «Hizb ut-Tahrir al-İslami» propaganda malümatları, terror faaliyetinde qullanılğan bağ vastaları, elektron malümat taşıyıcıları tapılıp alındı».
Ukraina prezidentiniñ Qırım Muhtar Cumhuriyetindeki temsilciligi Rusiye quvetçileriniñ areketlerini takbih etti, Milliy politsiyanıñ Qırım Muhtar Cumhuriyeti ve Aqyar Baş idaresi ise Ukraina Ceza kodeksiniñ 162-nci maddesiniñ 2-nci qısmına istinaden (mesken tiyilmemezligini bozuv) cinaiy tahqiqat başlattı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
