Bağçasaraydaki ekinci «Hizb ut-Tahrir davasınıñ» mabüsleri Rostov-na-Donu (Rusiye) Cenübiy okrugınıñ arbiy mahkemesi salonında iyülniñ 7-nde Qırımda keçirilgen kütleviy tintüvler ve insanlarnıñ tutulmasına qarşı narazılıq bildirdi.
Bu aqta «Qırım birdemligi» cemaat birleşmesi haber ete.
Mabüslerniñ qollarında yazuvlı şiarlar bar edi: «Soqur terrorist – çaresizligiñizniñ işaretidir», «Sahte qabaatlarnı toqtatıñız», «Qırımtatarlardan terrorist yapmağa yeter», «İmanımız parmaqlığıñızdan küçlüdir», «Bizni repressiyalarnen yıqamazsıñız», «RF apishanelerine sürgünlik bitsin», «Halqımız – terrorist degildir».
Hatırlatamız, ABD OSCE missiyası qomşu Rusiye tarafından işğal etilgen Qırımnıñ devam etken askeriyleştirilüvi sebebinden «qasevetlengenini bildire». Rusiye iyülniñ 7-nde «kütleviy tintüvler» keçirip, 7 qırımlı musulmannı tuttı.
Rusiye kontrolindeki Aqmescitniñ Kiyev rayon mahkemesi yañı «Hizb ut-Tahrir davasınıñ» bütün mabüslerini sentâbrniñ 2-ne qadar apiske almağa qarar berdi. Altı mabüs SİZOda, «Hizb ut-Tahrir» faaliyetini teşkil etkeninden şübheli sayılğan birinci derece körme saqatı, qırımlı musulman Aleksandr Sizikov ise ev apsinde olacaq.
İyülniñ 7-nde saba erte qırımlılarnıñ evlerinde tintüvler keçirildi: Emil Ziyadinov, İsmet İbragimov, Alim Sufyanov, Seyran Hayretdinov, Aleksandr Sizikov, Vadim Bektemirov, Zekirya Muratov ve Aluştada Dilâver Memetov. Memetov tintüv vaqtında evde degil edi, onı qıdırmağa devam eteler, dep bildire «Qırım birdemliginiñ» faalleri.
Rusiye FSBsiniñ malümatına köre, mahsus hızmetniñ hadimleri Qırımda «Hizb ut-Tahrirni» teşkil etkeninden ve iştirak etkeninden şübheli sayılğan yedi insannı tuttı.
Ukraina prezidentiniñ Qırım Muhtar Cumhuriyetindeki temsilciligi Rusiye quvetçileriniñ areketlerini takbih etti, Milliy politsiyanıñ Qırım Muhtar Cumhuriyeti ve Aqyar Baş idaresi ise Ukraina Ceza kodeksiniñ 162-nci maddesiniñ 2-nci qısmına istinaden (mesken tiyilmemezligini bozuv) cinaiy tahqiqat başlattı.
Ukraina Tış işler nazirligi beyanatını derc etip, «qırımtatarlarnıñ evlerinde keçirilgen yañı qanunsız tintüvler ve tutuvlarnen bağlı narazılığını» bildirdi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
