Rusiye kontrolindeki Bağçasaray rayon mahkemesi «Qırım birdemligi» birleşmesiniñ koordinatorlarından biri, Bağçasaraydaki ekinci «Hizb ut-Tahrir davasınıñ» mabüsi Server Mustafayevniñ anası Venera Mustafayevağa qarşı oğluna qol tutmaq maqsadınen keçirgen bir kişilik narazılıq aktsiyası içün açılğan memuriy dava protokollarını üç aftada ekinci kere politsiyağa qaytardırdı. Politsiya protokollarnı eki kere yañlış tizdi, dep bildirdi «Qırım birdemligine» advokat Lilâ Gemeci.
Rusiye quvetçileri protokollarnı tizgende şahısnıñ anketa malümatını soramadı, em de anda bulunğan insanlarnıñ razılığı olmasa da, video çıqardı, olarğa bu areketlerge izin bergen qanun normalarını da aytmadı. Gemeci bildirgenine köre, politsiya hadimleri protokolda tehnik vastalarnı qullanğanını qayd etmedi ve protokolğa kirsetilgen deñişmelerni baqmağa imkân bermedi.
«Mahkeme qararı ve Rusiyeniñ Memuriy bozuv kodeksiniñ 28.8 maddesine köre, bozuvlar üç kün içinde yoq etilmeli, amma bunı ne yapmadılar», – dep ayttı Gemeci. O, politsiya hadimleri «qadı», «şaat», «muracaat» ve «qanun» sözlerini tercime etip olamağan tercimannı davet etti, dep qoştı.
Vesiqada aytılğanına köre, qanun bozulğanını isbatlağan delil olaraq politsiya Qırım.Aqiqatta derc etilgen Venera Mustafayevanıñ bir kişilik narazılıq aktsiyası aqqında haberni qullandı. Dava malümatlarına maqale resimleri ilâve etildi.
Faallerniñ malümatına köre, dava Rusiye Memuriy cinayetler kodeksiniñ 20.6.1 maddesine istinaden (Fevqulâde vaziyet ola bilecek yerde yüksek seviyeli azırlıq rejimi alda qaidelerge riayet etmeme) ve Rusiye Memuriy cinayetler kodeksiniñ 20.2.2 maddesine istinaden (Açıq tedbir keçirilecegine dair haber etmeyip, açıq tedbirni teşkil etüv ya da ötkerüv) açıldı. Birinci madde boyunca 1 biñden 30 biñ rublege qadar para cezası ya da ihtar ola bile. Ekinci madde 20 biñden 30 biñ rublege qadar para cezası ya da 50 saatqa qadar mecburiy işler, ya da 10 künlik memuriy apis cezası berilmesini belgilemekte.
Sentâbrniñ 22-nde qadın Bağçasaray rayonındaki Rusiye İç işler nazirliginiñ bölügineçağırıldı.
Qırımdaki Rusiye İç işler nazirliginiñ saytından Venera Mustafayevağa qarşı açılğan memuriy davalar aqqında malümat yoq.
Sentâbrniñ 15-nde – oğlunıñ ükmü çıqarılğan künü – Venera Mustafayeva Bağçasarayda bir kişilik narazılıq aktsiyasına çıqtı. Qollarında yazuvlı şiar bar edi: «Camideki subetler – cinayet degildir! Oğlumnı qaytarıñız!».
Rusiyeniñ Rostov-na-Donu şeerindeki Cenübiy okrugınıñ arbiy mahkemesi Server Mustafayevni «Hizb ut-Tahrir davası» boyunca 14 yıl sert rejimli koloniyada qalmasına üküm etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
