İyülniñ 8-nde Büyük Britaniya TİN Qırımda insan aqları bozuvları aqqında yazılğan «İnsan aqları ve demokratiya – 2020» esabatını yayınladı.
Esabatta, işğal etilgen Qırımda ve qomşu Rusiyede diniy ve milliy azlıqlarnıñ ve dissidentlerniñ taqip etilüvi devam etkeni aqqında yazıla.
«Diniy azlıqlarnıñ taqipleri, şu cümleden ekstremistler dep adlandırılğan ve bu sebepten yasaq etilgen İyegova Şaaatlarınıñ tutulması da devam etti. Qırımda, asılında Rusiye akimiyeti azlıqlar ve dissidentlerni esassız tevqif etmege, iskencelerge oğratmağa ve qorqutmağa devam etti. Qırımda ve Rusiyede eñ azından 109 siyasiy mabüs apiste, olardan 72 qırımtatar, çoqusı yaramay şaraitte tutuldı, iskencelerge oğratıldı», – dep yazıla esabatta.
Bundan ğayrı, esabatta kösterilgen malümatqa köre, Rusiye halqara monitoring teşkilâtlarnıñ Qırımğa kirişine izin bermege çağıruvlarnı körmemezlike ura.
Ukraina TİN başı Dmıtro Kuleba Avropa Şurasınıñ Baş kâtibi Marieya Peyçinoviç-Büriç ile Qırımdaki insan aqları vaziyetine dair mahsus bir esabat azırlanılmasını muzakere etti.
Evel, Marieya Peyçinoviç-Büriç, iyülniñ 7-nde Vilnüste Ukrainada islâatlar meselelerinden Dörtünci konferentsiyanıñ açıluvındaki çıqışı vaqtında teşkilâtnıñ işğal etilgen Qırımdaki insan aqları vaziyetinden raatsız olğanını ayttı.
Hatırlatamız, Avropa Şurası Parlament assambleyası iyünniñ 23-nde aqşam Rusiye işğal etken Qırımda qırımtatarlarnıñ aqları aqqında qararnı qabul etti. Daa evel berilgen malümatqa köre, PACE musaviylik ve ayırımsızlıq meseleleri komiteti yarımadada qırımtatarlarnıñ aqlarını qoruv rezolütsiyasına teklif etilgen Ukraina tüzetüvleriniñ ekseriyetini qabul etti.
Ukraina eyyeti Avropa Şurası insan aqları komissarı Dunâ Miyatoviç ile baarde körüşip, Qırımda insan aqları vaziyeti, insanlarnıñ ğayıp oluvı ve qanunsız apis cezaları, qırımtatarlarnıñ aqlarını qoruv meseleleri ve Rusiyeniñ Qırımtatar Milliy Meclisini «terror teşkilâtı» olaraq tanıma qararınıñ lâğu etilüvi aqqında laf etken edi.
