Ukraina TİN başı Dmıtro Kuleba Avropa Şurasınıñ Baş kâtibi Marieya Peyçinoviç-Büriç ile Qırımdaki insan aqları vaziyetine dair mahsus bir esabat azırlanılmasını muzakere etti.
Bunıñ aqqında Kuleba Twitter saifesinde yazdı.
«Avropa Şurasınıñ Baş kâtibi Marieya Peyçinoviç-Büriç ile konstruktiv körüşüv. Ukranıñ Avropa Şurası Nazirler komitetiniñ Qırım ile bağlı soñ qararını desteklegenini bir daa tasdıqladım. Onıñ ömürge keçirilüvini ve Qırımdaki insan aqları vaziyetine dair mahsus bir esabat azırlanılmasını muzakere ettik» – dep yazdı Kuleba.
Evel, Marieya Peyçinoviç-Büriç, iyülniñ 7-nde Vilnüste Ukrainada islâatlar meselelerinden Dörtünci konferentsiyanıñ açıluvındaki çıqışı vaqtında teşkilâtnıñ işğal etilgen Qırımdaki insan aqları vaziyetinden raatsız olğanını ayttı.
Hatırlatamız, Avropa Şurası Parlament assambleyası iyünniñ 23-nde aqşam Rusiye işğal etken Qırımda qırımtatarlarnıñ aqları aqqında qararnı qabul etti. Daa evel berilgen malümatqa köre, PACE musaviylik ve ayırımsızlıq meseleleri komiteti yarımadada qırımtatarlarnıñ aqlarını qoruv rezolütsiyasına teklif etilgen Ukraina tüzetüvleriniñ ekseriyetini qabul etti.
Ukraina eyyeti Avropa Şurası insan aqları komissarı Dunâ Miyatoviç ile baarde körüşip, Qırımda insan aqları vaziyeti, insanlarnıñ ğayıp oluvı ve qanunsız apis cezaları, qırımtatarlarnıñ aqlarını qoruv meseleleri ve Rusiyeniñ Qırımtatar Milliy Meclisini «terror teşkilâtı» olaraq tanıma qararınıñ lâğu etilüvi aqqında laf etken edi.
