Rusiyede yasaqlanğan «Hizb ut-Tahrir» teşkilâtında iştirak etkeninde qabaatlanıp, 12 yılğa üküm etilgen ve Rusiye koloniyasına avuştırılğan qırımtatar aq qorçalayıcısı Emir-Usein Kuku sentâbrniñ 4-nde apayı Meryemge telefon etip, alı aqqında tarif etti. Bu aqta o, Facebookta bildirdi.
«Koloniyağa ketirilip, karantinge alındı. Bundan soñ 15 künge ceza izolâtorına alındı. Emir-Usein anda pek suvuq, dep tarif etti. Saba suvuq. Saba erte gimnastika vaqtında büyrekleri ağırıp başladı. Binada gimnastika yapa bilemi dep soradı? Cevap olaraq davada qaydı yapıldı ve ceza izolâtorına alındı. Tek bir sual içün…», – dep bildirdi Meryem.
Onıñ aytqanına köre, Emir-Usein «umumen alı bir qarar olğanını» bildirdi.
«SİZOda keçirgen 4,5 yıldan soñ bu bir qafes kibi, dolaşıp küneşte oturğan soñ azatlıqta kibi is ettim», – dep bildire Emir-Useinniñ sözlerini ömür arqadaşı.
Meryem Kukunıñ yazğanına köre, soñki yılda Emir-Useinniñ «büyrekleri pek ağıra».
«Hususan ceryan ve suvuq olğanda. Bir sıra mektüp ve şikâyetten soñ oña antibiotik berildi. Lâkin bir faydasını körmedi. Soñunace dayanacaq ve ağrı aqqında mecburen aytacaq, bilem», – dep bildirdi Meryem Kuku.
Qırımtatar aq qorçalayıcısı, Yaltadaki «Hizb ut-Tahrir davasınıñ» mabüsi Emir-Usein Kuku Başkortostan Cumhuriyetindeki Salavatnıñ №16 koloniyasına avuştırıldı.
İyünniñ 25-nde Moskva vilâyetiniñ (Rusiye) Vlasiha şeerindeki Arbiy istinaf mahkemesi Yaltadaki «Hizb ut-Tahrir davasınıñ» altı mabüsiniñ ükmüni deñiştirmeyip qaldırdı.
Böylece, Rostov-na-Donu Cenübiy okrugınıñ arbiy mahkemesiniñ 2019 senesi qabul etken qararı deñişmedi. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.
Amnesty International aq qorçalayıcı teşkilâtı Yaltadaki «Hizb ut-Tahrir davasınıñ» bütün mabüslerini vicdan mabüsi dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
