Rusiye arbiyleri Qırımnı işğal etip başlağan künü, fevralniñ 20-nde, Büyük Britaniya Tış işler nazirligi yarımada sakinlerine yardım etüv yañı leyhasınıñ başlanmasını ilân etti.
«Büyük Britaniya Qırım ile qomşu Hepson vilâyetinde yerli memuriy qurulışlarğa qol tutuv leyhasına 168 biñ funt sterling ayırdı, onıñ sayesinde yardımğa muhtac olğanlar yerli hastahanelerge bara ve Ukraina pasportlarını ala bilecektir», – dep aytıla memleketniñ Tış işler nazirliginiñ saytında.
Büyük Britaniya akimiyeti Rusiyeniñ Qırım işğaliniñ yedinci yılında Ukraina ile birdemligini bildirdi.
«Büyük Britaniya Ukraina ile beraber Qırımnıñ qanunsız ilhaqına qarşı çıqa ve ayatı Rusiye istilâsınıñ tesiri altında qalğanlarğa qol tutmağa devam etecek», – dep bildirdi memleketniñ tış işler naziri Dominic Raab.
Büyük Britaniya Tış işler nazirligi yarımadanı işğalden qurtaruv «Qırım platformasınıñ» qurulıvını alğışladı.
Müessise, yarımadada insan aqları bozuluvını qayd etken BM İnsan aqları monitoring missiyası keçken sene Büyük Britaniyadan aman-aman 700 biñ funt sterling aldı.
Fevralniñ 20-nde Ukraina Tış işler naziri Dmıtro Kuleba, Ukraina Qırımnı işğalden qurtaruv ğayretleri etrafında dünyanı birleştirmege tırışacaq, dep bildirdi.
Ukrainada fevralniñ 20-nde Sema yüzü qaramanlarını añıla. 2014 senesi fevralniñ 18-nden 20-ne qadar Kyivniñ mekrezinde yüzden çoq kişi elâk oldı, eñ çoq – fevralniñ 20-nde. Narazılıq aktsiyasınıñ elâk olğan iştirakçilerine «Sema Yüzü qaramanları» dep aytıp başladılar. Elâk olğanlar arasında ondan çoq uquq qoruyıcı da bar edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
