Link açıqlığı

Saatnıñ esas haberi

«Putin eñ müim şeyge emiyet bermedi»: Ukraina Tış işler nazirligi Qırım işğali aqqında hatırlattı


Dmıtro Kuleba
Dmıtro Kuleba

Ukraina Tış işler naziri Dmıtro Kuleba Rusiye arbiyleri Qırımnı işğal etmege başlağan kününde Ukraina işğalge razı olmaycaq ve dünyanı yarımadanı işğalden qurtaruv ğayretleri etrafında birleştirecek, dep hatırlattı.

«Bugün Rusiyeniñ Ukrainağa ücüm etip başlağanına 7 yıl tola. Vladimir Putin (Rusiye prezidenti – QA) «yeşil adamçıqlarğa» Qırımnı zapt etmege emir etti, amma eñ müim şeyge emiyet bermedi – o vaqıt ağır alda olğan Ukraina devletine degil, boysunmağan Ukraina halqına qarşı çıqtı. Rusiye istilâsı strategik maqsadına irişip olamadı – Moskva Ukrainanı tesiri altında tutamadı, aksine. Onı tamamen coydı», – dep qayd etti nazir.

Onıñ aytqanına köre, bugün Ukraina Avropa Birligi ve NATOğa ıntılğan Avropa devleti olaraq inkişaf etmege devam ete.

«Ukraina halqı öz kelecegini saylamaq içün bir vaqıt kimseden izin soramadı, soramay ve soramaycaq. Ukrainağa Rusiye istilâsına qarşı qol tutuv dünya koalitsiyası qala ve quvetleşe. Bu sene Ukraina dünyanı Qırımnı işğalden qurtaruv ğayretlerimiz etrafında birleştirmek içün «Qırım platformasını» başlata. Ukraina bir, serbest ve mustaqil edi ve qalacaq», – dep ayttı Kuleba.

Ukrainada fevralniñ 20-nde Sema yüzü qaramanlarını añıla. 2014 senesi fevralniñ 18-nden 20-ne qadar Kyivniñ mekrezinde yüzden çoq kişi elâk oldı, eñ çoq – fevralniñ 20-nde. Narazılıq aktsiyasınıñ elâk olğan iştirakçilerine «Sema Yüzü qaramanları» dep aytıp başladılar. Elâk olğanlar arasında ondan çoq uquq qoruyıcı da bar edi.

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG