Rusiye prezidenti Vladimir Putin ile "doğru bağ"dan soñ, rusiyeli Qırım başı Sergey Aksönov, Qırımdan kelgen iç bir sual cevapsız qalmaz, dep söz berdi. Amma, Qırım.Aqiqat mühbiri tarafından soralğan yerli faaller ve cemiyetçiler, yarımadanıñ rusiyeli akimiyeti qırımlılarnıñ meselelerini çezip olacağında şübelene.
"Doğru ağ" vaqtında qırımlılardan kelgen bütün muracaatlar baqılacaq ve nezaret altına alınacaq. Biz er meseleni baqıp çıqarıq, er mesele boyunca qarar alırmız ve yapılğan işlerimiz aqqında halqqa haber etermiz. Bu, içtimaiy ağlardaki saifelerime kelgen suallerge de ait", - dedi Aksönov.
Qırım biznesmeni Oleg Zubkovğa fikrince, Vladimir Putinniñ "doğru ağ"ında muracaatlarınıñ çoqusı, yarımada sakinleriniñ çezilmegen meselelerinen bağlı.
"Rusiye prezidenti Vladimir Putinge berilgen suallerniñ çoq olğanı, prezidentke büyük inanç tasdıqı degil, bu - adamlar çaresizlik ve ümütsizlikni duyğanlarını, bölgelerde qabarcılıqnıñ büyük seviyesini köstergen şeydir", - dedi iş adamı.
Rusiye jurnalisti Oksana Yakubets, qırımlılar Sergey Aksönovnıñ taqımınıñ işini begenmey, dep saya.
"Sergey Aksönovnıñ taqımı köpürler, ava limanlar ve kosmodromlarnıñ qurulışınen meşğul edi. Aksönovnıñ yarımada şeer ve rayonlarına ziyaretleri, adamlar oña inanmağanını kösterdi, taqımı azaları ise dülber yalanlar içün endi yeterli söz tapıp olamaylar", - dep saya jurnalist.
O, Sergey Aksönovnıñ vadelerini, sentâbrde olacaq rusiyeli Qırım yerli şura saylavlarınen bağlay.
Bu taqımnen Qırımnıñ kelecegi yoqOksana Yakubets
"Kene aynı vadeler - suv, gaz, yollar, abadanlaştıruv. Amma adamlarnı endi aldatıp olamazsıñ, olar, "Yekâne Rusiye" firqasına berilgen er rey - Aksönovnıñ qorantası ve yaqınlarınıñ cebinde qoşma bir kapik olacağını, añlaylar. Bu taqımnen Qırımnıñ kelecegi yoq", - dedi jurnalist.
Qırımğa köçip kelgen Rusiye blogeri Aleksandr Gornıy, yarımadanıñ Moskova nezaretindeki akimiyeti, qırımlılarnıñ kerçek ve mevcut meselelerini bile, dep emin.
"Bütün meselelerni ve qıyınlıqlarnımemurlar öyle de bile, eñ azından bilmeliler. Şahsiy sualler bar, amma daa başqa - sistemli meseleler bar, olar yıllarnen toplana, olar aqqında biz daima laf yürsetemiz, amma olarnıñ çezilmesinde iç bir ilerlev yoq", - dedi Gornıy.
Yaltada Qırım faali Lüdvika Papadopulu daб Sergey Aksönovnıñ sözlerini ve vadelerini kelecek saylav kampaniyasınen bağlay.
Aksönov yaramay oyunda yahşı sıma yapmağa tırışaLüdvika Papadopulu
"Yekâne Rusiye" firqasınıñ reytingleri tüşkeninden sebep aytılğan boş laflar. Aksönov yaramay oyunda yahşı sıma yapmağa tırışa", - dep saya o.
O, Qırımnıñ rusiyeli başı bergen sözler yerine kelmeyceginde emin.
"Kerçekten ise o, iç bir sözüni yerine ketirmez, qırımlılarnıñ şikâyetleri de onı meraqlandırmay. Olar öz zenginleştirüvinen ve Moskova elitalarınıñ istekleriniñ yerine ketirmesinen meşğul. Bilmeyim, Aksönovğa, onıñ sözlerine ve vadelerine inanğan barmı asıl", - dedi faal.
Rusiye prezidenti Vladimir Putinnen er yıl yapılğan "doğru ağ" iyünniñ 20-sinde ilhaq etilgen Qırımdan suallersiz ve canlı video bağsız keçti. Merasim dört saattan çoqqa sürdi, ve Qırımnıñ yekâne añması Keriç köprüniñ demiryol qısmınıñ qurulışınen bağlı edi.
Maqalede, Rusiye ilhaq etken yarımadada qabul etilgen ıstılaat qullanıla
