Herson şeer Meclisi dünyanıñ küçlü memleketlerini «Qırımnıñ işğalci akimiyetiniñ yapqanlarına» tesir etecek faydalı bir mehanizmni işlep çıqarmasına çağırdı. Bu şekilde Meclis işğal etilgen Qırımda FSB tarafından tutulğan qırımtatar faali Edem Bekirovnıñ apiske alınmasını izaatladı.
«Beş yıldan berli Rusiye akimiyeti Ukraina devletine barışıq içinde yaşamağa ve inkişaf etmege bermey. Bu yılları Qırımda qırımtatarlar ve ukrainler uydurılğan cinayetlerni işlegeninde qabaatlana. Bu müddet içinde biñlernen tintüv keçirildi, işğalni tanımağan ve özüni ukrainalı dep sayğanlar qorquzıla ve azaplarğa oğratıla», – dep aytıla şeer Meclisiniñ reisi İbragim Suleymanovnıñ beyanatında.
Herson Meclisi qayd etkenine köre, Qırımda «esas insan aqları muntazam sürette bozula».
«Onlarnen cemaat faali öldürilgen, işkencege oğratılğan ve ğayıp olğan edi. Onlarnen insan qanunsız mahküm etildi. Gençler askerlikke alına, barışıq toplaşuvlarnıñ keçirilmesi yasaqlana, söz serbestligi sıñırlana. Bular Rusiye devleti tarafından insan aqlarına riayet etilmegenini köstere, Rusiye devlet terrorını qullanğan diger devletler ile bir sırada», – dep aytıla beyanatta.
Kreml kontrolindeki Aqmescitniñ Kiyev rayon mahkemesi dekabrniñ 13-nde qırımtatar faali Edem Bekirovnı eki ayğa apiske aldı. O, 2019 senesi fevralniñ 11-ne qadar apiste qalacaq. Ukraina Tış işler nazirligi mahkeme qararına qarşı «sert narazılıq» bildirdi.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
Herson vilâyetindeki Novoalekseyevka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutuldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler.
