Mariupoldeki «Azovstal» zavodında eñ az 100 vatandaş qala. Bu aqta Mariupol şeer yolbaşçısınıñ mesleatçısı Petro Andryuşçenko bildirdi.
«Mariupol. «Azovstal». Sığınaqlarda, arbiylerden ğayrı, 100 vatandaş qala. Faqat işğalcilerniñ ücümleri eksilmey. Ağır top ve aviatsiya bütün kün zavodqa ateş etip turdı. Ücüm ıntıluvları muvafaqiyetsiz qala. Şunıñ içün şeer kene küçlü ateş seslerini eşite», – dep yazdı Andryuşçenko mayısnıñ 10-nda Telegramda.
Ukrainanıñ vaqtınca işğal etilgen topraqlar meseleleri naziri İrina Vereşçuk mayısnıñ 7-nde bildirgenine köre, «Azovstal» zavodından bütün qadın, bala ve esli-başlı insanlar tahliye etildi. «Azov» polkunıñ vekilleri mayısnıñ 8-nde vatandaşlar toplanması zor olğan viraneler altında qala bile, dep haber etti.
«Azovstal» zavodında «Azov» polkunıñ askerleri ve piyade askerler buluna.
Ukraina prezidenti Volodımır Zelenskıynıñ mayısnıñ 8-nde bildirgenine köre, Ukraina Mariupolni cenk yolunen bloktan çıqarıp olamaz. Böylece, Zelenskıy jurnalistlerniñ «Azovstal» zavodı imayecileriniñ tahliye çağıruvlarınen bağlı sualine cevap berdi.
«Blok etilgen Mariupol er kün zarar köre… Arbiylerimiz istegeni kibi, cenk yolunen bloktan çıqarmağa imkânsızdır. Bugün böyle bir imkânımız yoq. Bunı açıq-aydın aytqan edik. Ukrainanıñ Mariupolni cenk yolunen azat etecek ağır silâsı yoq. Bu bir fikir degil, bu ordu reberligimizniñ hulâsasıdır», – dep ayttı devlet yolbaşçısı.
O, Kyiv diplomatiya yolunen tahliyege irişmege tırışa ve bunıñ sayesinde vatandaşlar zavoddan çıqıp oldı, dep qoştı. Lâkin, prezidentniñ aytqanına köre, arbiyler ayatını Moskva muzakere etmege istemey. Ukraina muzakerelerge Türkiye, İsrail, İsveçre, Frenkistan, BM ve Qızıl Haç Halqara Komitetiniñ temsilcilerini celp etti.
Mariupol fevralniñ 24-nde başlağan büyük istilânıñ ilk künleri Rusiye ordusı tarafından sarıp alındı. Ukraina bölükleri üç aydan berli tirene.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
