Rusiye tahqiqatı tarafından Aqmescit civarındaki «gaz borusında diversiya» yapqanından şübheli sayılğan qırımlı Aziz Ahtemov SİZOda tutuv şaraitlerini şikâyet etti.
Dekabrniñ 27-nde yazğan mektübini ömür arqadaşı Adile Ahtemova bugün derc etti.
«27.12.2021 senesi 6 kişilik kamerada 9 insan tutula. Yer pek az, künniñ ortasında er kes uyansa, aşamaq içün sofra yanına barmağa çare yoq. Epimiz ayrı aşaymız, nevbetnen. Toqtamağan televizor sesi ve Rusiye propagandasınıñ haberleri bütün fikirlerni qarıştıra. Sağlığımıznı baqmağa tırışamız, amma dımlılıq sebebinden er kes toqtamayıp öksüre. Urbalar 2-3 kün quruy. Pencere daima açıq, çünki er kes sigar içe, tütün ise bir yerge çıqmaq kerek. Başqa çare olmağanına baqsañ, dayanmaq mümkün», – dep qayd etti Ahtemov.
O, işğal altındaki yarımadanıñ Rusiye akimiyeti tarafından taqip etilgen qırımtatar faallerine qoltutqan er keske minnetdarlığını bildirdi.
Oktâbr ayında «gaz borusındaki diversiya» davasınıñ mabüsi Aziz Ahtemovnıñ apiste qaluv müddeti 2022 senesi yanvarniñ 23-ne qadar uzatıldı.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
