Link açıqlığı

Saatnıñ esas haberi

Qırımda apiske alınğan Aziz Ahtemovnıñ babasına 8 biñ ruble para cezası berildi


Rusiye kontrolindeki Aqmescitniñ Kiyev rayon mahkemesi, nümüneviy fotoresim
Rusiye kontrolindeki Aqmescitniñ Kiyev rayon mahkemesi, nümüneviy fotoresim

Moskva kontrolindeki Aqmescitniñ Kiyev rayon mahkemesi Qırımda apiske alınğan qırımtatar faali Aziz Ahtemovnıñ babasına 8 biñ ruble para cezasını berdi. Bu qararnı Rusiye qadısı Viktor Krapko çıqardı, dep haber ete Qırım.Aqiqat mühbiri.

Onıñ malümatına köre, mahkeme Eskender Ahtemovnı kütleviy tedbirlerde iştirak etip, yüksek seviyeli azırlıq rejimini bozğanında qabaatladı. Eskender Ahtemov ise FSB binası ögünde FSB hadimleri tarafından tutulğan oğlu aqqında malümat almaq içün bulundı, dep ayttı. Oturışuvdan soñ cemaat imayecisi Hatice Mamutova mahkeme bu davada istisna yapmayıp, sentâbrniñ 4-nde tutulğan insanlarğa qarşı bütün esnaslarnıñ umumiy yönelişinden vazgeçmey, dep qayd etti.

Rusiye kontrolindeki Qırım Yuqarı mahkemesi sentâbrniñ 24-nde Asan Ahtemov ve Aziz Ahtemovnıñ apiske alınmasına qarşı berilgen istinaf şikâyetini qanaatlendirmedi.

Asan Ahtemovğa qarşı qabaatlav sertleştirilgen edi. Bundan evel o, FSB hadimleri tarafından işkencege oğratıldı, dep bildirdi. Ahtemov tutulğan soñ birden aqımnen işkencege oğratıldı, dep ayttı.

Advokat Azamatov Asan Ahtemovnıñ ağrıları bar ve nefesi tutula, dep bildirgen edi, lâkin Aqmescitteki SİZO №1 oña qarşı basqı qullana ve uyğun olmağan şaraitlerde tuta.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

Anğara köyündeki «gaz borusında diversiya» davası

Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.

Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.

FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.

Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.

Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.

Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.

Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.

XS
SM
MD
LG