Sentâbr 7-sinde Ukraina-Rusiye almaşuvında azat etilgen mabüsler, endi biometriya vesiqalarını aldı.
Bunı Ukraina Devlet Migratsiya hızmeti bildire.
"Deñiz askerleri ve siyasiy mabüsler, Rusiyede esirlikte ya da apishanede tutulğan vaqıtta coyulğan vesiqaları yerine, yañı ID karta şeklinde Ukraina vatandaşlığı pasportlarını ve çetelge barmaq içün Ukraina vatandaşı pasportlarını aldı", - bildirdiler Ukraina Devlet Migratsiya hızmetinde.
Bildirile ki, azat etilgen ukrainler tedaviylengen yerlerge baracaq köçüci pasport hızmeti noqtalarını azırlağan edi.
Sentâbrniñ 11-inde Facebookta Ukraina ombudsmeni Lüdmila Denisova, azat etilgen ukrain deñizciler ve sabıq siyasiy mabüslerge ID pasportları berilecek, dep haber etken edi.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı. Oleğ Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
