Qara deñizde, Ayuv Dağ yanında balalarnen qayıqlarda raatlanğan büyük turistler gruppasını qurtardılar. Bu aqta Rusiye FVN-niñ Qırım idaresi biuldirmekte.
Nazirlikniñ malümatına köre, raatlanıyıcılar Ayuv Dagnıñ yanında olğanda, apansızdan köçken şiddetli yel içün, qurtarıcılardan yardım soradı, çünki özleri yalığa yetişip olamadı.
Mahsus operatsiyada katernen qurtarıcılar ve şahsiy yahta iştirak etti.
"Birleşip, olar 17 adamnı (olardan 4-ü - bala) yalığa ketirip oldı. Kimseniñ tibbiy yardımğa ihtiyacı yoq edi", - denile müessise matbuat hızmetiniñ beyanatında.
Tünevin qırımda umumen eki suv qazası oldı, 19 adam qurtarıldı, dep bildire ilhaq etilgen Qırımnıñ FVN.
Aluştada, Raboçiy ugolok şeer plâjında deñizde aqay az qaldı batacaq edi, Rusiye FVN-niñ hadimleri ise onı qurtardı.
İyün soñunda Aluştada "banan" suv attraktsionında eglengen 14 adamnı aqıntı deñizge alıp ketti. Olarnıñ arasında 8 bala bar edi.
