Ukraina prezidenti Petro Poroşenko Rusiye tarafından mahküm etilgen Ukraina vatandaşları – ukrain faali Volodımır Baluh ve jurnalist Roman Suşçenkonı doğğan kününen tebriklep, Ukraina Rusiye, Qırım ve Donbasta tutulğan ukrainalı siyasiy mabüslerniñ azat etilüvi içün küreşmege devam ete, dep qayd etti.
«Volodımır ve Romannıñ küçü ve metaneti ayrette qaldıra, Kremlniñ repressiv maşinası basqı etkenine baqmadan, olar boysunmadılar. Ukrainanıñ kerçek oğulları böyle ola – cesür ve ideallarına sadıq. Rusiyede tutulğan ukrainalı siyasiy mabüsler ve işğal etilgen Donbas ve Qırımda esirlerniñ azat etilüvi içün küreşmege devam etemiz. Yeñecegimizden şübhem yoq!», – dep aytıla Poroşenkonıñ Facebookta derc etilgen muracaatında.
Qırımlı ukrain faali Volodımır Baluh cuma künü, fevralniñ 8-nde, 48 yaşını toldura, jurnalist Roman Suşçenko – 50 yaşını.
Avropa parlamentiniñ deputatları Rusiye tarafından mahküm etilgen Ukraina vatandaşları Volodımır Baluh ve Roman Suşçenkoğa mektüp yazğanlar.
Kyivde fevralniñ 8-nde «Volodımır Baluhqa azatlıq!» aktsiyası keçirildi, Qırımda faaller Volodımır Baluhnıñ anasını oğlunıñ doğğan kününen tebrikledi.
Kreml kontrolindeki Qırım Yuqarı mahkemesi ukrain faali Volodımır Baluhnıñ imayesine cezası müddetiniñ ğayrıdan baqıluv muracaatını red etti. Kreml nezaretindeki Qırım Yuqarı mahkemesi Volodımır Baluhnı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.
2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi. Daa soñra mahküm etilgen ukrain faali açlıqnı vaqtınca toqtatmağa qarar aldı. Advokatlarnıñ malümatına köre, 200 künden çoq açlıq tutqan Baluhnıñ ülser ve pankreatit şübesi peyda oldı.
FSB, Volodımır Baluhnı 2016 senesi dekabrniñ 8-nde tuttı. FSB hadimleri Volodımır Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
«Memorial» aq qorçalayıcı merkezi Volodımır Baluhnı siyasiy mabüs olaraq tanıdı. Aq qorçalayıcılarnıñ fikirince, faalni taqip etüv sebebi evinde tiklegen «Sema Yüzü Qaramanları soq., 18» levhası olğan.
