Qırımlı faaller fevralniñ 8-nde Rusiye tarafından mahküm etilgen ukrain faali Volodımır Baluhnıñ anası Natalya Baluhnı 48 yaşını toldurğan oğlunıñ doğğan kününen tebrikledi.
Qırım.Aqiqat mühbiriniñ bildirgenine köre, faaller Natalya Baluhqa maddiy yardım, bayramlıq tort ve tatlı ketirip, oğluna bergen terbiye içün teşekkürler bildirdi ve Qırımtatar Milliy Meclisiniñ reisi Refat Çubarovnıñ hayırlavını oqudı.
«Volodânıñ o qadar dostu bar eken, onıñ sayesinde mende de bar», – dep ayttı Natalya Baluh.
Qırımtatar halqınıñ lideri, Ukraina halq deputatı Mustafa Cemilev ve Qırımtatar Milliy Meclisiniñ reisi, halq deputatı Refat Çubarov fevralniñ 8-nde Qırımda Rusiye mahkemesi tarafından mahküm etilgen Ukraina vatandaşı Volodımır Baluhnı doğğan kününen hayırladılar.
Qırımlı ukrain faali Volodımır Baluh cuma künü, fevralniñ 8-nde, 48 yaşını toldurdı. Şu künü «Qırım aq qorçalayıcı gruppasınıñ» faalleri Kyivde «Baluhqa azatlıq» aktsiyasını keçire.
Kreml kontrolindeki Qırım Yuqarı mahkemesi ukrain faali Volodımır Baluhnıñ imayesine cezası müddetiniñ ğayrıdan baqıluv muracaatını red etti. Kreml nezaretindeki Qırım Yuqarı mahkemesi Volodımır Baluhnı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.
2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi.
Daa soñra mahküm etilgen ukrain faali açlıqnı vaqtınca toqtatmağa qarar aldı. Advokatlarnıñ malümatına köre, 200 künden çoq açlıq tutqan Baluhnıñ ülser ve pankreatit şübesi peyda oldı.
FSB, Volodımır Baluhnı 2016 senesi dekabrniñ 8-nde tuttı. FSB hadimleri Volodımır Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
«Memorial» aq qorçalayıcı merkezi Volodımır Baluhnı siyasiy mabüs olaraq tanıdı. Aq qorçalayıcılarnıñ fikirince, faalni taqip etüv sebebi evinde tiklegen «Sema Yüzü Qaramanları soq., 18» levhası olğan.
