Qırımlı vatandaş jurnalisti Ayder Kadırov «çaqmama» davası boyunca berilgen 30 biñ ruble para cezasını 10 rublelik kapiklernen ödedi, dep bildire «Qırım birdemligi» cemaat birleşmesi.
«Qısqa müddet içinde, adet üzre, 10 rublelik kapiklernen kerekli qadar para toplağan qırımtatar faalleri Ayder Kadırovğa para cezasını ödemege yardım etti», – dep aytıla haberde.
Kadırov para cezasını ödese de, Rusiye kontrolindeki Seyitler rayon mahkemesiniñ para cezası qararını «adaletsiz» dep saya.
«Maña ve diger qırımtatarlarğa qarşı mahkeme davaları sahte. Bazı insanlar apiste yata, bazıları memuriy ya da cinaiy dava boyunca para cezalarını töley», – dep ayttı Kadırov.
Hatırlatamız, iyül ayında Rusiye kontrolindeki Qırım Yuqarı mahkemesi 30 000 ruble para cezasını alğan «Qırım birdemligi» vatandaş jurnalisti Ayder Kadırovnıñ «başqasını çaqmama» davası boyunca istinaf şikâyetini red etti.
2020 senesi avgustnıñ 31-nde peyda olğan malümatqa köre, Rusiye quvetçileri Sudaq, İçki ve Seyitler rayonlarında qırımtatarlarnıñ evlerini tinte. Faallerniñ malümatına köre, tintüvler Enver Topçi, Ayder Ablâkimov, Ridvan Umerov ve Ayder Kadırovnıñ evinde keçirildi.
Dört qırımlığa qarşı Rusiye Ceza kodeksiniñ 205.6 maddesine istinaden (cinayet aqqında haber etmeme) dava açıldı. Maddege köre, 100 biñ ruble qadar para cezası, bir yıllıq mecburiy işler ya da bir bir yıl azatlıqtan marum etüv cezası berile bile.
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
Rusiye kontrolindeki Sudaq şeer mahkemesi Qırımdaki Rusiye Fevqulâde vaziyetler nazirliginiñ hadimi Ayder Ablâkimovnı «başqasını çaqmağanı» içün 30 biñ ruble para cezasına üküm etti. Rusiye kontrolindeki Sudaq şeer mahkemesi mayısnıñ 28-nde qırımtatar faali Ridvan Umerovğa başqasını çaqmağanı içün 30 biñ ruble para cezasını berdi.
