Rusiye kontrolindeki Qırım Yuqarı mahkemesi 30 000 ruble para cezasını alğan «Qırım birdemligi» vatandaş jurnalisti Ayder Kadırovnıñ «başqasını çaqmama» davası boyunca istinaf şikâyetini red etti.
Bu aqta «Qırım birdemligi» cemaat birleşmesi Kadırovnıñ advokatı Emil Kurbedinovnıñ aytqanlarına esaslanıp bildire.
İmayeniñ fikirince, mahkemeden evelki tahqiqat vaqtında ve mahkemede advokatlar Kadırovnıñ qabaatsız olğanını isbatladı, lâkin buña baqmadan, mahkeme eski qararnı deñiştirmedi.
«Bu FSBniñ daa bir deñevi, Qırımda vatandaş jurnalistleri ve faal insanlarnı taqip etüv sarımı», – dep bildirdi Kurbedinov.
Ayder Kadırovnıñ fikirince, bu esnas «qırımtatarlarğa basqı yapmaq» içün teşkil etildi.
«Bu cinaiy davanı qırımtatar musulmanlarına qarşı ve jurnalist olaraq maña basqı olaraq sayam», – dedi Kadırov.
Daa evel «Qırım birdemligi» cemaat birleşmesiniñ vatandaş jurnalisti Ayder Kadırovnıñ «başqasını çaqmama» davası boyunca istinaf şikâyetiniñ baqılması dava materiallarında istinaf şikâyetiniñ kopiyası olmağanı içün iyülniñ 22-ne qaldırğan edi.
Rusiye kontrolindeki Sudaq şeer mahkemesi Qırımdaki Rusiye Fevqulâde vaziyetler nazirliginiñ hadimi Ayder Ablâkimovnı «başqasını çaqmağanı» içün 30 biñ ruble para cezasına üküm etti.
Rusiye kontrolindeki Sudaq şeer mahkemesi mayısnıñ 28-nde qırımtatar faali Ridvan Umerovğa başqasını çaqmağanı içün 30 biñ ruble para cezasını berdi.
Buña oşağan qabaatlav boyunca Ayder Kadırov 30 biñ ruble para cezasını aldı.
2020 senesi avgustnıñ 31-nde peyda olğan malümatqa köre, Rusiye quvetçileri Sudaq, İçki ve Seyitler rayonlarında qırımtatarlarnıñ evlerini tinte. Faallerniñ malümatına köre, tintüvler Enver Topçi, Ayder Ablâkimov, Ridvan Umerov ve Ayder Kadırovnıñevinde keçirildi. Onıñ ömür arqadaşı evlerinde tintüv olmadı, amma aqayınıñ Ukraina pasportı tutıp alındı, onı ise Aqmescitke sorğuğa alıp ketkenler, dep bildirdi.
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
Ukraina Tış işler nazirligi Qırımda keçirilgen yañı tintüv ve insan tutuvlarına qarşı narazılıq bildirdi ve Rusiyeden BM qararlarınıñ yerine ketirmesini ve tutulğan qırımtatarlarnı azat etecegini bekley, dep bildirdi.
