Avropa Birliginiñ temsilcileri aprelnin 17-sinde Moskovanıñ Lefortovo mahkemesiniñ oturışını ziyaret etkeninden soñ, AB, zapt etilgen ukrain deñiz askerleriniñ deral azat etilmesini bir daa talap etti.
Bu aqta Avropa Birliginiñ saytında derc etilgen AB spikeriniñ bildirüvinde aytıla.
Avropa Birliginde hatırlattılar ki, deñizciler apiste bulunğance, Rusiye olarnıñ uquqiy imaye aqqını itibar etmeli. Bundan ğayrı, ücüm vaqtında yaralanğan askerlerge kelekli tibbiy yardım etilmeli.
“Avropa Birligi hatırlata ki, Rusiyeden zapt etilgen 24 ukrain deñiz askeriniñ deral azat etilmesini bekleymiz”, - denile AB-niñ bildirüvinde.
Bundan ğayrı spiker hatırlata ki, Keriç boğazında olğan vaqialardan soñ, Avropa Birligi sanktsiyalarğa oğrağan rusiyelilerniñ cedvelini arttırdı.
Tünevin Moskovanıñ Lefortovo mahkemesi, Qırım yalısı yanında zapt etilgen dört ukrain arbiy adamnıñ tevqif müddetini iyülniñ 24-üne qadar uzattı.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
