Avropa Birligi "Şimaliy aqım-2"nen bağlı AQŞ-nıñ sanktsiyalarına qarşılıq kösterdi. Azatlıq Radiosınıñ rus hızmeti DPA-ğa atıf etip bildirgeni kibi, Brusselde, "AB qanuniy biznesnen oğraşqan Avropa şieketlerine qarşı sanktsiyalarğa asıl qol tutmay", dep ayttılar.
Agentlik, bunı aytqan adamnıñ adını açıqlamay.
"Şimaliy aqım-2"niñ açıq ve qanun boyunca çalışması ve kerekli közetilmesi er vaqıt AB-niñ maqsadı edi", - dedi menbaa.
2019 senesinden başlap AB-nde Avropa gaz bazarında çalışqan bütün gaz hattılarnıñ işini tertip etken qaideler bar.
AQŞ prezidenti Donald Trump tünevin, "Şimaliy aqım-2" gaz hattınıñ qurulmasında iştirak etken şirketlerge qarşı sanktsiyalar aqqında qanun leyhasını imzaladı. Sanktsiyalar, “Şimaliy aqım – 2” ve "Türkiye aqımı" gaz hattısınıñ quruluvına alâqası olğan şirketler ve etel vatandaşlarına qarşı kirsetildi.
Esas tış icracısı, Allseas İsveçre şirketi, boru töşemesini toqtatqanını bildirdi.
Almaniya Amerika sanktsiyalarını tenqit ete.
Bunıñnen beraber Berlinde, AQŞ-nıñ sanktsiyalarına cevap bermeyceklerini bildireler, çünki olar devletke qarşı degil, şahsiy şirketlerge qarşı kirsetildi.
Moskovada da AQŞ sanktsiyalarını tenqit ettiler.
Dekabr 17-sinde AQŞ Kongressiniñ vekiller palatası, “Şimaliy aqım – 2” ve "Türkiye aqımı" gaz hattısınıñ quruluvına alâqası olğan şirketlerge qarşı sanktsiyalar qoyuluvı aqqında vesiqanı qabul etti.
Sanktsiyalar deñiz seviyesinden 100 fut aşağı taba terenlikte borularnı toşegen gemilerge ve bu leyhanıñ quruluvına añlı tarzda gemilerni satqan ya da kiralıq bergen çetel adamlarğa qoyula.
Qarar daa Senat tarafından qabul etilmek kerek. Bunıñ kelecek atfanıñ başında olacağı beklenile.
«Şimaliy aqım-2» (Nord Stream-2) leyhası gaznı Rusiyeniñ şimalindeki yataqlardan, Ukraina ve Poloniyadan keçken ananeviy tranzit marşrutlarını çette qaldırıp, Baltıq deñizniñ tübünden doğrudan Almaniyağa alıp barıp teslim etecek. Leyha, artıq qurulğan birinci «Şimaliy aqım»nıñ imkânlarını kenişletecek.
Avropa komissiyasında, «Şimaliy aqım-2»niñ qurulması taqdirde şeffaflıq, diskriminatsiyanıñ olmaması ve musaviy irişüv printsipleri bozulacaq, dep bildirdiler.
