Qurucılar, 2018 senesi oktâbr 17-sinde atuv ve patlav neticesinde bozulğan Keriç kolleciniñ binasında tamir işleri bitirildi.
Bu aqta Qırım İlim Nazirliginiñ sözlerinden TASS Rusiye haber agentligi yaza.
“Keriç kolleci tamirleviniñ birinci qısmı yekünlendi. Temelli tamirlevni 2019 senesi yazda yapmağa niyetlenemiz”, - İN-niñ vekili sözlerinden yaza agentlik.
Qırımnıñ rusiyeli İlim Nazirliginiñ saytında şimdilik bu aqta malümat yoq.
Dekabrniñ 26-nda Keriç politehnik kolleci baş binasınıñ bütün qalğan tarafında oktâbr faciasından soñ ilk sefer dersler keçirildi.
Bundan evel Keriç politehnik kolleci 2019 senesi yanvarniñ 14-nde tolusınen açılacaq, dep bildirilgen edi.
Patlav ve atışuv çarşenbe künü, oktâbrniñ 17-nde, Keriç politehnik köllecinde oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
