Dekabrniñ 26-nda Keriç politehnik kolleci baş binasınıñ bütün qalğan tarafında oktâbr faciasından soñ ilk sefer dersler keçirildi, dep bildirdi Keriçniñ Rusiye yolbaşçısı Sergey Borozdin.
«Zaliv» gemi yapıcılığı zavodı yardım etti. 70-inci yıllardan berli aman-aman qullanılmağan ve qazaiy vaziyette bulunğan yedek çıqışnıñ ğayrıdan tiklenmesine müessisesi yarım million rubleden ziyade ayırdı. «Zaliv» hadimleri öz teşebbüsinen iş vaqtı tışında kere olğan maden bünyelerni yaptı. Bir ay içinde qapı aldı donatıldı ve zemaneviy qapular qoyuldı. Talebelerniñ oñaytlığı içün eñ yaqın vaqıtta yañı kiriş gruppasınıñ yarığını yapmağa planlaştırıla», – dep aytıla haberde.
Borozdinniñ aytqanına köre, bundan evel talebeler üçünci korpusqa sığmağa mecbur edi.
Şeer yolbaşçısı dey ki, baş kiriş ve müessiseniñ patlavdan eñ çoq körgen qısmı daa qapalı qala. Anda tamir işleri devam ete.
Bundan evel Keriç politehnik kolleci 2019 senesi yanvarniñ 14-nde tolusınen açılacaq, dep bildirilgen edi.
Patlav ve atışuv çarşenbe künü, oktâbrniñ 17-nde, Keriç politehnik köllecinde oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
