Ukraina Reintegratsiya naziriniñ birinсi muavini Vâçeslav Zemlinskiy, nazirlik “ATR devlet tarafından destek almaq kerek olğanına inanğanını” bildire, amma Donbas ve Qırımğa yayınlağan diger telekanallar da paranen temin etilmek içün muracaat etkenler ve onıñ fikrince olarnıñ episi aynı şartlarda olmalılar.
Zemlinkiy Yuqarı Radanı bücetni ğayrıdan baqıp çıqmağa ve vaqtınca işğal etilgen topraqlar içün ziyade para ayırmağa çağırdı.
Bunı nazirniñ birinci muavini Yuqarı Radada Ükümetke sualler saatı vaqıtnda ayttı.
“ATR şirketine kelgende – bu "Atlant SV" hususiy cemiyettir. Bugünde-bugün “2021 Ukraina devlet büceti aqqında” qanun hususiy strukturalarnıñ doğrudan paranen temin etilmesini közde tutmay. Elbette ATR devlet tarafında para almalı. Amma bu paranıñ taqsimlevi ameldeki qanunlarğa köre olmalı. Bundan ğayrı, işğal etilgen topraqlarğa yayınlağan daa bir sıra diger telekanallar muracaat etti”, – Zemlinskiyniñ aytqanlarından “Ukrinform” alıntı ketire.
Reintegratsiya nazirligi, Ukraina Qırım ve Donbasqa yayın yapqan kanallarğa qol tutmaq içün tahminen 50 mln ğrıvnâ sarf etecek, dep haber etti. Ukrainanıñ vaqtınca işğal etilgen topraqlarınıñ reintegratsiya meseleleri nazir muavini İğor Yaremenko nazirlik resurslarnı bir qaç lotqa ayırmağa teklif ete, dedi.
«Biz ananeviy seyircisi qırımtatar halqınıñ vekilleri olğan ATR telekanalına qol tutmaq ne qadar müim olğanını añlaymız. İşğal etilgen Qırımdan ve Lugansk ve Donetsk vilâyetleriniñ ayrı rayonlarından ketmege mecbur olğan diger kanallar da yardımğa muhtac», – dedi İğor Yaremenko.
Onıñ aytqanına köre, maddiy yardım almaq içün 14 kanal muracaat etti.
ATR qırımtatar telekanalınıñ baş müdiri ve saibi Lenur İslâmov Ukrainanıñ vaqtınca işğal etilgen topraqlarınıñ reintegratsiya nazirligini devlet bücetinden para aluv esnasını sozğanında qabaatladı.
ATR Ukrainadan sürgün etilgen qırımtatarlar ve diger millet insanlarını yerleştirüv bücet programmasına köre 2016 senesinden berli devlet bücetinden maddiy yardım ala.
2015 senesi aprelniñ 1-nde ATR Rusiye litsenziyasını alamayıp, işğal etilgen Qırımda yayınlarını toqtattı. Yayınlar 2015 senesi iyünniñ 17-nde yañıdan başladı – telekanal Kyivge köçti.
