ATR qırımtatar telekanalınıñ baş müdiri ve saibi Lenur İslâmov Ukrainanıñ vaqtınca işğal etilgen topraqlarınıñ reintegratsiya nazirligini devlet bücetinden para aluv esnasını sozğanında qabaatladı.
«Bücette para bar. Onı telekanal doğru destek olaraq alacaq edi. Lâkin nazir Oleksiy Reznikov (Reintegratsiya naziri – QA) onı hızmetke berdi. Yani ATR tenderde iştirak etmeli. Amma ne tender, ne de onıñ şartları bar. Ne keçirilecek vaqtı, ne de ATRniñ raqipleri belli», – dep aytıla telekanal saytındaki beyanatta.
İslâmov, Reznikovnen keçirilgen körüşüvde o, tenderni azırlamaq içün nazirlikke yarım yıl ve yarış keçirmek içün eki ay kerek, dep ayttı. Telekanalnıñ baş müdiri böyle şartlarnı «ayırım» dep adlandırdı.
«Biz yarışlardan tış turamız, biz – tamır halqnıñ telekanalımız, şunıñ içün sıra alıñız, siziñ kibi soyları çoq dep aytılğanda bizni siyasiy statussız qaldıralar», – dedi İslâmov.
Yuqarı Radanıñ Bücet komitetiniñ azası olğan Ukraina halq deputatı Oleksiy Ğonçarenko Ukraina parlamenti ATRge para bermege qarar berdi, amma esnasnı «Reintegratsiya nazirligi toqtata», dep bildirdi.
«Ne yazıq ki, Reintegratsiya nazirligi zor yolnen ketti, anda neticesi belli olmağan çoq aylıq azırlıq bar. Kanal ise informatsion «cebede» mında şimdi çalışmalı. Qarar bekleycek vaqıt yoq. Şunıñ içün işdeşlerimnen beraber İşğal etilgen topraqlar nazirliginiñ vekillerini nevbetteki oturışuvğa davet etti, milliy telükesizliknen de bağlı olğan bu meseleni baqacaqmız», – dedi Ğonçarenko Facebook saifesindeki video muracaatında.
Reintegratsiya nazirligi bunı resmiy şekilde daa izaatlamadı.
Reintegratsiya nazirligi, Ukraina Qırım ve Donbasqa yayın yapqan kanallarğa qol tutmaq içün tahminen 50 mln ğrıvnâ sarf etecek, dep haber etti. Ukrainanıñ vaqtınca işğal etilgen topraqlarınıñ reintegratsiya meseleleri nazir muavini İğor Yaremenko nazirlik resurslarnı bir qaç lotqa ayırmağa teklif ete, dedi.
«Biz ananeviy seyircisi qırımtatar halqınıñ vekilleri olğan ATR telekanalına qol tutmaq ne qadar müim olğanını añlaymız. İşğal etilgen Qırımdan ve Lugansk ve Donetsk vilâyetleriniñ ayrı rayonlarından ketmege mecbur olğan diger kanallar da yardımğa muhtac», – dedi İğor Yaremenko.
Onıñ aytqanına köre, maddiy yardım almaq içün 14 kanal muracaat etti.
ATR Ukrainadan sürgün etilgen qırımtatarlar ve diger millet insanlarını yerleştirüv bücet programmasına köre 2016 senesinden berli devlet bücetinden maddiy yardım ala.
2015 senesi aprelniñ 1-nde ATR Rusiye litsenziyasını alamayıp, işğal etilgen Qırımda yayınlarını toqtattı. Yayınlar 2015 senesi iyünniñ 17-nde yañıdan başladı – telekanal Kyivge köçti.
