Rusiye Federatsiyası tarafından işğal etilgen Qırımda Rusiye akimiyeti, Rusiye mahsus hızmetleri kontrol etken Rus pravoslav kilsesinden ğayrı, bütün konfessiyalarnı yoq etip, aman-aman diniy alannıñ "temizlevini" yekünledi. Bu aqta "ATEŞ" partizan areketi agentleri ve yerli sakinlerniñ malümatına atıf etip bildire.
Faallerniñ malümatına köre, Qırımdaki Ukrayina Ortodoks Kilsesiniñ faaliyeti aman-aman toqtatıldı. "İşğalciler ibadethanelerni yoq etmege başladılar: Kezlevde Krestovozdvijenskiy kilsesi bütünley yıqıldı, Aqmescitte ise Aziz Vladimir ve Olga Katedral kilsesiniñ qapıları söküldi", — deyler partizan areketinde.
Berilgen malümatqa köre, mecburiy seferberlik qorquzuvları sebebinden yarımadanı soñki Ukrayinalı papaz terk etken, bu ise, aslında, "yeparhiyanıñ resmiy barlığı içün bir noqta qoydı".
"Aqyarda ve diger şeerlerde "İyegova şaatları" cemiyetlerine qarşı terror devam ete. Qanunsız tintüvler, ana-baba aqlarından marum etüv qorquzuvları ve dindarlarnıñ mecburiy psihiatrik tedaviylenüv adiselerini qayd etemiz", — dep bildire ATEŞ.
Moskva tarafından tayin etilgen resmiy "müftiyat" ile işbirlik yapmaq istemegen Qırımtatar musulman cemiyetleri de basqığa oğray.
Areket faalleri Qırım sakinlerini Rusiye akimiyetiniñ cinayetlerini qayd etmege, cemiyetlerniñ taqip etilmesine ve diniy binalarnıñ yıqıluvına alâqası olğan tahqiqatçılar, mahkemeciler ve haberciler aqqında malümat toplamağa çağıralar.
