Rusiye mahkemesi mahküm etken qırımlılar Asan ve Aziz Ahtemvlar Qırımdan Rusiye apishanelerin etap etildi – Vladimir ve Minusinskke. Bu aqta «Qırım birdemligi» siyasiy mabüslerniñ ömür arqadaşları bergen malümatqa esaslanıp haber ete.
Aziz Ahtemov «Zonatelekom» vastasınen qorantasınen laf etti ve mektüpte vaqtınca Çelâbinsk SİZOsında buluna, amma Minusinsk apishanesine ketecek, dep yazdı. «Mında endi qar yağa ve ava suvuq. Oktâbr ayında qar yağğanını körmek alışqan degilim, amma ne yapacañ, alışırmız», – dep yazdı faal.
Asan Ahtemov Vladimir vilâyetinde «Vladimirskiy tsentral» olaraq belli apishanege avuştırıldı. Üç aftadan berli qorantası bulunğan yerini bilmey.
«Qayda olğanını daa bilmeyim. Vladimirskiy tsentralnen bağlanıp, anda keldimi dep soradım, maña ise «poçtağa resmiy muracaat yapılmalı, telefonda bir şey bilip olamam, dep cevap bergenler. Sualime cevap bergenler – Qırımdan Vladimir vilâyetine etap ne qadar devam ete ve uzun ola – üç ayğa qadar – dep aytqanlar», – dep izaatladı Repika Ahtemova, Asan Ahtemovnıñ ömür arqadaşı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Oktâbrniñ 2-nde Nariman Celâl ve ağa-qardaş Ahtemovlar Aqmescitteki SİZO-2-den alındı ve Rusiye apishanelerine etap etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
