Link açıqlığı

Saatnıñ esas haberi

Advokat: Asan Ahtemovnıñ qabaatlavını sertleştirüv – «itiraf şaatlığından vazgeçkeni içün FSB intiqamıdır»


Qırımlı advokat Ayder Azamatov
Qırımlı advokat Ayder Azamatov

Qırımda «gaz borusında diversiya yapqanından» şübheli sayılıp apiske alınğan qırımlı Asan Ahtemovğa qarşı qabaatlavnı sertleştirüv «itiraf şaatlığından vazgeçkeni içün FSB intiqamı ola», dep bildirdi Ahtemovnıñ advokatı Ayder Azamatov Qırım.Aqiqatqa.

O, qabaatlavğa «teşkilâtlanğan gruppa tarafından yapılğan diversiya» (Rusiye Ceza kodeksiniñ 281-inci maddesiniñ 2-nci qısmı, «a» maddesi) ve «insan gruppası tarafından patlayıcı madde ya da patlayıcını qanunsız saqlav, berüv, satuv, alıp ketüv, yollav ya da taşuv» (Rusiye Ceza kodeksiniñ 222.1 maddesiniñ 4-ünci qısmı) ilâve etildi, dep tasdıqladı.

«Bu sertleştirüv ola ve maddeler eñ az 10 yılğa azatlıqtan marum etüvni belgiley. FSB, Asandan birinci itiraf şaatlığından vazgeçkeni içün intiqam ala», – dep bildirdi advokat Qırım.Aqiqatqa.

Bundan evel Asan Ahtemovğa qarşı sertleştirilgen qabaatlav aqqında advokat Nikolay Polozov bildirdi.

Aqmescit civarındaki Anğara köyüniñ «gaz borusında diversiya» yapqanından şübheli sayılğan Aziz Ahtemov FSB hadimleri oña qarşı işkence qullandı, dep bildirdi.

Daa evel berilgen malümatqa köre, Qırımda «gaz borusında diversiya» yapqanından şübheli sayılıp apiske alınğan Asan Ahtemov onı tutıp, birden aqımnen işkence ettiler, dep bildirdi.

Rusiye quvetçileri «diversiya davası» mabüsleriniñ advokatları bergen malümatnı açıq şekilde tefsir etmey. Qırım.Aqiqat, apiske alınğan qırımtatar faallerine qarşı FSB tarafından yapılğan işkencelernen bağlı informatsion muracaatnı FSBge yolladı.

Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.​ ​Advokat Nikolay Polozovnıñ sentâbrniñ 8-nde bildirgenine köre, imaye Rusiye kontrolindeki Aqmescit mahkemesiniñ qırımtatar faali Nariman Celâlnı apiske almaq qararını şikâyet etti.​

Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.

FSB, diversiyanı «Ukraina Mudafaa nazirliginiñ Baş istihbarat idaresi teşkil etti», dep israr ete.

Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.

Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.

Ukraina Tış işler naziri Dmıtro Kuleba sentâbrniñ 6-nda Ukrainanı ziyaret etken Amerika kongressmenlerine Qırımda keçirilgen yañı tintüv ve tutuvlar aqqında tarif etip, olarnı yarımadada basqılarnı toqtatmaq maqsadınen Kremlge qarşı basqı quvetleştirüvde yardım etmelerine çağırdı.

Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.

Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG