Qırımda tevqif etilgen qırımtatar faalcisi, bloger Nariman Memedeminov ukrain habercilerini, yarımadada rusiye quvetçileriniñ tarafından adam taqiplerine ziyadece diqqat ayırmağa, çağırttı.
Bu hitapnı o advokatı Edem Semedlâyevnen yolladı dep haber ete Qırım.Aqiqatnıñ muhbiri.
“Bugün er jurnalist, gazetacı, habercınıñ vazifesi - Qırımda olıp keçken vaqialarnıñ kerçeklerini aytacaq adamlarnı tapmaq ve olarnen sıq bağda bulunmaq. Ümüt etem ki, Qırım meselesi ileride de pressada ayrı ve müim yer alacaq”, - dedi Memedeminov.
Ve oña qoltutqan bütün ukrain meslekdeşlerine minnetdarlığını bildirdi.
“Men eminim, kün-künden menim, siyasiy sebepler necisende yapılğan, taqibim ile bağlı malümat daa çoq, daa keñ yayınlanacaq ve daa çoq adam kerçekni bilecek, quvetçiler köstermege tırışqanını degil”, - dep qoştı Memedeminov.
Ukraina Yuqarı Radasınıñ İnsan aqları boyunca vekâletlisi Lüdmila Denisova Rusiyeden qırımlı bloger, faalci Nariman Memedeminovnıñ Qırım psihiatriya hastahanesine mecburen yatqızılğanına dair malümat bergenini talap etti.
Mayıs 15-te Rusiyeniñ kontroli altında olğan Aqmescitniñ Kiyevskiy rayon mahkemesi, terrorizm propagandasında qabaatlanğan qırımtatar faali, vatandaş jurnalisti Nariman Memedeminovnıñ tevqif muddetini dört ayğa uzattı.Memedeminov avgustnıñ 15-ne qadar tahqiqat izolâtorında qalacaq.
Martnıñ 23-nde Qırım MC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden evelki taqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesini «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
