Kreml kontrolindeki Aqyar valisi vazifelerini vaqtınca eda etken Mihail Razvojayev şeer ükümetini istifağa yolladı. İşbu buyruq ükümetniñ saytında iyülniñ 13-nde derc etildi.
«2019 senesi iyülniñ 12-nden başlap Aqyar ükümetiniñ istifası aqqında ilân etmek. Ükümetke Aqyarnıñ yañı ükümetini şekillendirmek içün vekâletlerini kerçekleştirmege avale etmek», – dep aytıla vesiqada.
Bundan evel Razvojayev bir ay içinde yañı taqımnı şekillendirmege planlaştıra, dep bildirdi.
Hatırlatamız, iyülniñ 11-nde Rusiye prezidenti Vladimir Putin Aqyarnıñ rusiyeli başı Dmitruy Ovsânnikovnıñ istifağa çıqmasını qabul etti, şeer başı vazifelerini vaqtınca Mihail Razvojayev eda etecek.
Razvojayev taqdim etilgen soñ şeer ükümetini eñ yaqın vaqıtta istifağa yollaycaq, dep bildirdi.
Belli olğanı kibi, 2018 senesi noyabr ayından başlap Rusiyedeki Krasnoyarskta doğma Razvojayev Umumrusiye halq cebesiniñ Merkeziy ştabına saylanğan edi. 2018 senesi dekabrniñ 17-den başlap ise Umumrusiye halq cebesiniñ icra komitet reberi oldı. Yedek zabiti, leytenant. Rusiyeniñ 2-nci sınıf devlet mesleatçısı ola.
