Aqyardaki «Hizb ut-Tahrir davasınıñ» üçünci mabüsi Ferat Sayfullayev Rusiye apsinden azat etildi. Bu aqta advokat Edem Semedlâyev Qırım.Aqiqat mühbirine tarif etti.
Sayfullayev qomşu Rusiyeniñ Kirov vilâyetindeki Omutninsk koloniyasında yattı. O, apis müddeti bitkeninen koloniyadan azat etildi.
Sayfullayev Rusiye Ceza kodeksiniñ 205.5 maddesiniñ 2-nci qısmına («Terror teşkilâtınıñ faaliyetinde iştirak etüv») istinaden qabaatlandı. 2016 senesi sentâbr ayında Sayfullayev 5 yıl umumiy rejim koloniyasında qalmasına üküm etilgen edi. Qabaatını tanımadı, Rusiye Anayasasınıñ 51-inci maddesine esaslanıp, malümat bermekten vazgeçti.
Yanvar ayında berilgen malümatqa köre, Aqyardaki «Hizb ut-Tahrir davasınıñ» mabüsi Rustem Vaitov Rusiye apsinden azat etildi. Daa soñra Aqyardaki «Hizb ut-Tahrir davasınıñ» mabüsi Nuri Primov azatlıqqa çıqtı.
2016 senesi sentâbr ayında Rostov-na-Donu şeeriniñ Şimaliy-Kavkaz okrugınıñ arbiy mahkemesi qararını seslendirip, «Hizb ut-Tahrir davası» boyunca qabaatlanğan aqyarlılar Ferat Sayfullayev, Rustem Vaitov ve Nuri Primovnı beş yıl umumiy rejim koloniyasında qalmalarına üküm etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
