Link açıqlığı

Saatnıñ esas haberi

Aqyardaki «Hizb ut-Tahrir davasınıñ» mabüsi beş yıl yatqan Rusiye koloniyasından çıqtı


Rustem Vaitov Rusiye koloniyasından azat etildi
Rustem Vaitov Rusiye koloniyasından azat etildi

Aqyardaki «Hizb ut-Tahrir davasınıñ» mabüslerinden biri Rustem Vaitov Rusiye apishanesinden azat etildi. O, Kurgan şeeriniñ koloniyasında tutulğan edi.

Bu aqta advokat Edem Semedlâyev Qırım.Aqiqat mühbirine bildirdi.

«Rustem Vaitov koloniyada beş yıl yatqan adam kibi körüne. Şunıñ içün, ilk evelâ, MRT yaptırmaq içün diagnostik merkezge yol alacaqmız. Yarın üyleden soñ ise evde, Qırımda, olacaqmız», – dep ayttı onı koloniyadan qarşılağan advokat.

Vaitov yarımadanıñ Rusiye işğalinden soñ «Hizb ut-Tahrir davası» boyunca apiske alınğan ve apis cezasını çekip azat etilgen ilk qırımlı mabüs oldı. Onı Rusiye Ceza kodeksiniñ 205.5 maddesiniñ 2-nci qısmına istinaden («Terror teşkilâtınıñ faaliyetinde iştirak etüv») qabaatladılar. 2016 senesi sentâbr ayında Vaitov 5 yıl umumiy rejim koloniyasında qalmasına üküm etildi.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG