Aqyardaki cermay bazasına qarşı darbe Ukrayına Silâlı quvetleriniñ qarşı ücümine azırlıq elementlerinden biri ola, dep bildirdi Ukrayına Silâlı quvetleri Cenüp mudafaa quvetleriniñ Birleşken matbuat merkeziniñ reberi Natalâ Ğumenük telemarafon yayınında.
Onıñ aytqanına köre, «duşman yedekleri telükede olğanını is etip, manövr etmege başlay». Onıñ qayd etkenine köre, rusiyeliler yavaş-yavaş Novorossiysk tarafındaki baza noqtalarına keçe, çünki Aqyar körfezlerinde özüni raat is etmey ve turğun bir logistik teminlevini körmey.
Ğumenük bildirgenine köre, Qırımda rusiyelilerniñ bunıñ kibi küçlü yedekleri yoq, lâkin olar yedeklerini farqlı yerlerde tuta bile.
«Taqip etip, mıtlaqa tapacaqmız», – dedi Ğumenük.
Aprelniñ 29-na keçer gecesi Aqyarnıñ Kazaçya körfezinde cermay bazası yandı, dep bildirdi Qırım.Aqiqat mühbiri. Onıñ aytqanına köre, yanğın pek küçlü edi, tuman tek saba dağıldı. Gece saat ekilerde atış sesleri eşitildi.
Şeerniñ Rusiye yolbaşçısı Mihail Razvojayev yanğınnıñ sebebi uçucısızlarnıñ ücümi oldı, dep bildire. Onıñ aytqanına köre, yerli sakinler içün bir telüke yoq, yanğında kimse yaralanmadı. Kimse tahliye etilmeycek, amma adise civarlarında zeerli madde ölçüsi yapılacaq.
Qırımnıñ Rusiye yolbaşçısı Sergey Aksenovnıñ aytqanına köre, yarımadada ava mudafaa quvetleri bir uçucısıznı urıp tüşürdi, daa bir uçucısız radioelektron küreş vastalarınen bastırıldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
