Aqyarda yañı koronavirus hastası qayd etildi. Bu aqta aprelniñ 13-nde şeerniñ operativ ştab toplaşuvında haber ettiler.
«RİA Novosti Krım» yazğanına köre, COVID-19 daa evel şeerniñ Şimaliy tarafında №4 hastahanesine ketirilgen qadında tasdıqlandı. Bu bölükte olğan hastalar yuqunç hastahanesine alındı, dep yaza neşir.
Bu malümatnı «Krıminform» akimiyet tarafdarı saytı şeerniñ Rusiye yolbaşçısı Mihail Razvojayevniñ malümatına esaslanıp bildire.
«29 hasta yuqunç hastahanesine avuştırıldı, tahminen 20 tibbiyet hadimi izolâtsiya rejiminde buluna», – dep bildirildi ştab toplaşuvında.
Qayd etilgenine köre, hastanen alâqada olğan bütün tibbiyet hadimleri observatorğa çevirilgen «Solnışko» pansionatına alınacaq.
Aqyarda aprelniñ 13-ü sabasına qadar yañı koronavirus hastaları qayd etilmedi, 583 insan COVID-19 telükesi sebebinden ekimlerniñ nezareti altında buluna.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
