Aprelniñ 13-ü sabasına qadar Aqyarda yañı koronavirus hastaları qayd etilmedi, dep bildire şeerniñ Rusiye akimiyeti. 583 kişi COVID-19 telükesi sebebinden ekimlerniñ közetüvi altında buluna.
Bu aqta Rusiye kontrolindeki Aqyar ükümetiniñ saytında haber etile.
«Yuqunç hastahanesinde COVID-19 diagnozı tasdıqlanğan eki insan buluna, olar kerekli tibbiy yardım ala. 35 insan yuqunç hastahanesinde qala. 548 kişi yaşağan yerinde közetüv altında buluna», – dep aytıla haberde.
Aprelniñ 12-nde Qırımda 31 koronavirus hastası bar edi. 2973 insan közetüv altında bulundı. Aqyarda altı insan hastalandı, dördü tüzeldi.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
